რუსთავის 2–ის საქმის განმხილველი მოსამართლე ნათია გუჯაბიძის დედა, მანანა დოლიძე, რუსთავი 2–თან ინტერვიუში ადასტურებს, რომ მას თბილისში, პოლიტკოვსკაიას ქუჩაზე არსებული ბინა ნამდვილად ჰქონდა გაქირავებული, თუმცა, არ აკონკრეტებს, კონკრეტულად როდის და რა მიზნით უხდიდა სახელმწიფო მას ფულს ბინის დაქირავების სანაცვლოდ.

გთავაზობთ რუსთავი 2–ის ჟურნალისტისა და მანანა დოლიძის გასაუბრებას უცვლელად:

თქვენი შვილი თქვენ ფულს არ გიხდიდათ ბინის ქირაობის სანაცვლოდ?

მე ჩემი შვილი კი არ მიხდიდა ფულს, სამ შორის დაიდო (ხელშეკრულება), ჩემს შორის, რაღაც ის არის, სპეციალური სამსახური ხოა მაგისი, ჩემი შვილი მე რას მიხდიდა? მე მიხიდა და ვიხდიდი კიდევ გადასახადი რომ არის.

თქვენი შვილი თქვენგან ბინას არ ქირაობდა?

ჩემი შვილიდან მე ფული არ ამიღია. მე მიხდიდა სახელმწიფო იმისთვის, რომ ქირაობდა, არ ვიცი.

ანუ ადასტურებთ?

მე ბინა მქონდა გაქირავებული.

ვისზე გქონდათ გაქირავებული?

დამანებეთ რა თავი.

თქვენს შვილზე გქონდათ?

ვინ გკითხავთ თქვენ, ამოქექეთ და ნახეთ ვისზეც მქონდა.

დღეს, 1 ივნისს, რუსთავი 2-ის გენერალურმა დირექტორმა, ნიკა გვარამიამ საგანგებო ბრიფინგზე განაცხადა, რომ რამდენიმე საათის წინ ტელეკომპანიისთვის კონფიდენციალური წყაროსგან ცნობილი გახდა რუსთავი 2-ის საქმის ერთ-ერთი მოსამართლის, ნათია გუჯაბიძის უკანონო ქმედების შესახებ. მთავარი პროკურატურა კი სწორედ ამ ბერკეტის გამოყენებით ახდენს მოსამართლეზე ზეწოლას:

"საქმე იმაშია, რომ 2014 წელს მას სახელმწიფომ გამოუყო სახსრები იმიტომ, რომ მან განაცხადა, არ ჰქონდა საცხოვრებელი სახლი თბილისში და სამოსამართლეო უფლება-მოსილების განხორციელებისთვის სჭირდებოდა ანაზღაურება, რაც მიღებული პრაქტიკაა. აღმოჩნდა, რომ მას ეს სახლი ჰქონდა და ბინას ქირაობდა საკუთარი დედისგან, შესაბამისად ის ითვისებდა აღნიშნულ თანხებს უკანონოდ".

გვარამიას ინფორმაციით, აღნიშნული ცნობილი გახდა იუსტიციის საბჭოსთვის, რის შემდეგაც საბჭომ ფაქტზე მოკვლევა დაიწყო. მისი თქმით, მაშინდელმა იუსტიციის საბჭოს ხელმძღვანელმა და უზენაესი სასამართლოს თავმჯდომარემ მოითხოვა საქმის პროკურატურაში გადაცემა, თუმცა ახალდანიშნულმა იუსტიციის საბჭოს წევრებმა ამას მხარი არ დაუჭირეს, რადგან გუჯაბიძე წულუკიანის გუნდთან ასოცირდებოდა.

On.ge ინფორმაციის გადასამოწმებლად დაუკავშირდა იუსტიციის უმაღლესი საბჭოს პრესსამსახურს. პრესსამსახურის თქმით, მოსამართლის მიმართ დისციპლინური დევნის საქმე კონფიდენციალურია, შესაბამისად, არ შეუძლიათ მოგვაწოდონ ინფორმაცია იმის შესახებ, ნამდვილად იყო თუ არა რუსთავი 2-ის საქმის მოსამართლის მიმართ დისციპლინური დევნა.

თბილისის სააპელაციო სასამართლოში დასასრულს უახლოვდება რუსთავი 2–ის საქმის განხილვა, ერთ–ერთი განმხილველი მოსამართლე კი ნათია გუჯაბიძეა. რუსთავი 2–ის წარმომადგენლები მიიჩნევენ, რომ სააპელაციო სასაამართლო პირველი ინსტანციის მსგავსად, რუსთავი 2–ის წილებს ქიბარ ხალვაშს მიაკუთვნებს.