ბრაზილიელი მსახიობი სუზანა ვიეირა რიო დე ჟანეიროში ქალთა უფლებების დასაცავად მარშის მოწყობას გეგმავს. როგორც მსახიობმა ერთ-ერთ ინტერვიუში თქვა, ის აღარ აპირებს ქვეყანაში გაბატონებულ უსამართლობას შეეგუოს.

"ჯერ კიდევ 50 წლის წინ, როცა პირველ ნაბიჯებს ვდგამდი, ხმამაღლა ვთქვი, რომ არ ვითამაშებდი სუსტ და დაუცველ ქალებს. ჩემი მთავარი მიზანი, მთელი ჩემი კარიერის განმავლობაში, ქალებისთვის მაგალითის მიცემა იყო, სწორედ ამიტომ ყოველთვის ვირჩევდი როლებს, რომელიც დაადასტურებდა, რომ ბრძოლას და ცხოვრების გაგრძელებას ყოველთვის აქვს აზრი. ბრაზილიაში ქალებზე ძალადობენ ქმრები, მამები, შვილები, თანამშრომლები, ძალადობენ ყველგან. სწორედ ამიტომ დროა ერთხელ და სამუდამოდ ჩვენ, ქალები ერთმანეთს კიდევ ერთხელ დავუდგეთ მხარში და გავაგებინოთ რიოს, სან-პაულოს, ბრაზილიას და მთელს მსოფლიოს, რომ ჩვენ ძლიერი, მრისხანე ხმა გვაქვს, რომელსაც წინ ვერაფერი ვერ დაუდგება", - ამბობს სუზანა.

აღსანიშნავია, რომ ერთი თვის წინ ბრაზილიაში, ქალაქ სან-პაულოში ყოფილმა ქმარმა ცოლი მოკლა, იმავე დღის საღამოს კი მსგავსი ფაქტი რიო დე ჟანეიროში დაფიქსირდა.

როგორც გაირკვა, ქალზე ძალადობის ფაქტები ბრაზილიაში ხშირად ხდება. ამას დაემატა ისიც, რომ მსახიობმა ჟოზე მაიერმა ჟურნალ Vejo-სთან ინტერვიუში, ქალ პარტნიორებზე ირონიულად ისაუბრა და მათი სამსახიობო ნიჭის ნაცვლად აქცენტები მათი სხეულის ფორმებზე გააკეთა, რაც მიუღებელი აღმოჩნდა მისი კოლეგებისთვის და ბოდიშის მოხდა მოსთხოვეს, მაიერმა ბოდიში მოიხადა და თქვა, რომ ის ყოველთვის იცავდა და დაიცავს ქალთა უფლებებს.

გახშირებული ძალადობა და მსგავსი დამოკიდებულებები გახდა ბოლო წვეთი, რამაც ბრაზილიელი მსახიობები მასშტაბურ აქციამდე მიიყვანა, რომელსაც მსოფლიოში სიდიდით და რეიტინგით ნომერ მეორე კომპანია გლობოს მსახიობები შეუერთდნენ.