გერმანიაში კაცმა ტკბილეულის მწარმოებელი კომპანიის — Haribo-ს დაკარგული ჩეკი შემთხვევით იპოვა, რომელიც თითქმის 5 მილიონი დოლარის ღირებულების იყო. კაცმა კომპანიას დაკარგული ჩეკი დაუბრუნა, მადლობის ნიშნად კი ის კანფეტებით დაასაჩუქრეს.

როგორც კაცი იხსენებს, ის დედასთან მიდიოდა სტუმრად, როცა დაინახა მიწაზე დავარდნილი თეთრი ქაღალდი როგორ ფრიალებდა. მან ქაღალდი აიღო და წაიკითხა, რომ ეს დაახლოებით 5 მილიონი დოლარის ღირებულების ჩეკი იყო, რომელიც Haribo-ს ეკუთვნოდა.

"ჩეკზე იმდენად დიდი თანხა ეწერა, რომ მისი სწორად წარმოთქმაც კი არ შემიძლია. თუმცა ვფიქრობ, რომ კომპანიის მხრიდან საკმაოდ "იაფი" მადლობა მივიღე", — განაცხადა ჩეკის მპოვნელმა კაცმა ინტერვიუში. მან ასევე დასძინა, რომ Haribo-სგან საჩუქრად 6 დიდი ყუთი მიიღო, რომლებიც კომპანიის სხვადასხვა სახის ტკბილეულით იყო სავსე.

Haribo-ს წარმომადგენელმა ინციდენტი დაადასტურა და განაცხადა, რომ ჩეკის დაკარგვის მიუხედავად, მისი განაღდება მხოლოდ კომპანიას შეეძლო. წარმომადგენლის თქმით, ჩეკის მპოვნელს სტანდარტული სამადლობელი პაკეტი გაუგზავნეს, რომელიც ტკბილეულებით იყო სავსე.