10 რამ, რაც ნაცნობი იქნება, თუ ყოველთვის ყველგან აგვიანებ

არაპუნქტუალურობა ცუდი თვისებაა — ამაზე ყველა ვთანხმდებით, თუმცა უამრავი მცდელობის მიუხედავად, დროის სწორად განაწილება და მართვა ზოგიერთი ჩვენგანის ძლიერი მხარე არაა. რაც არ უნდა ადრე გავიღვიძოთ და რომელ საათზეც არ უნდა დავიწყოთ მზადება, თითქოს რაღაც უხილავი ძალა ყოველთვის გვიშლის ხელს, დანიშნულების ადგილზე დროზე მივიდეთ.

ამ სტატიაში იმ 10 გრძნობას გაგიზიარებთ, რომელიც შენთვისაც ნაცნობი იქნება, თუ ყოველთვის ყველგან აგვიანებ:

1. ამბობ, რომ უკვე გამოხვედი, თუმცა ჯერ საწოლიდანაც არ ამდგარხარ

"კი, უკვე გამოვედი" — ამ ფრაზის მიღმა უამრავი ტყუილი იმალება: შეიძლება ჯერ საწოლიდანაც არ ამდგარხარ, შხაპს იღებ ან სულაც ახლაღა გაგახსენდა, რომ სადღაც ხარ წასასვლელი.

2. "5 წუთში მოვალ"

ქვეყნის მეორე ბოლოშიც რომ იყო, ყველას არწმუნებ, რომ 5 წუთში მათთან გაჩნდები. მთავარია, არ აკონკრეტებ, ამ 5 წუთის ათვლა საიდან უნდა დაიწყონ.

3. მობილურზე ათასი მაღვიძარა და შემხსენებელი გიყენია

შენი ტელეფონით გამუდმებით წკრიალებს — თითქოს ეს დროის სწორად განაწილებაში უნდა გეხმარებოდეს, მაგრამ რატომღაც მაინც აგვიანებ.

4. სხვებს ჰგონიათ, რომ ეს ჩვევა არ გაწუხებს

დამსახურებულ საყვედურებს იღებ, მაგრამ ხანდახან შენც ნაწყენი რჩები, რადგან სხვებს ჰგონიათ, დაგვიანება გიხარია. არადა, ღმერთია მოწმე, სულ ცდილობ, გამოსწორდე.

5. ყოველი დაგვიანების შემდეგ საკუთარ თავთან პირობას დებ, რომ შეიცვლები

მაგრამ ამ პირობის შესრულება ძალიან რთულია!

6. თავის გასამართლებელი საბუთები მუდამ მზად გაქვს

"მე კი არ დავიგვიანე, სხვები მოვიდნენ ზედმეტად ადრე".

7. ბოდიშს ხშირად იხდი

"მოდი, დავიწყოთ ბოდიშით" — დანიშნულების ადგილზე მისვლისთანავე ყველას ებოდიშები და წინასწარ მომზადებული თავის გასამართლებელი მიზეზებიდან ერთს ან რამდენიმეს იყენებ.

8. ადამიანები ზოგჯერ იმაზე ადრე გთხოვენ მისვლას, ვიდრე საჭიროა, მაგრამ მაინც აგვიანებ

ხანდახან მეგობრები გატყუებენ, რომ დანიშნულების ადგილზე 8 საათზე კი არა, არამედ 8-ის ნახევარზე უნდა მიხვიდე, მაგრამ შენს მოტყუებას აზრი არ აქვს, რადგან მისვლას 9 საათამდე ვერ ახერხებ.

9. სხვების დაგვიანებაზე ხმას ვერ იღებ

ათასში ერთხელ ისეთ ადამიანს შეხვდები, რომელიც შენზე არაპუნქტუალურია, თუმცა სანამ საყვედური დაგცდება, ენაზე იკბენ — გულის სიღრმეში იცი, რომ გაბრაზების უფლება მხოლოდ პუნქტუალურ ადამიანებს აქვთ.

10. ყველას უკვირს, როცა არ აგვიანებ

ზოგჯერ სასწაული ხდება და დანიშნულების ადგილზე დროულად მიდიხარ, თუმცა ამ დროს ყველა უფრო მეტ ყურადღებას ამახვილებს შენს არაპუნქტუალურობაზე, რაც, ცოტა არ იყოს, გწყინს.

ბოლო ამბები:

გირჩევთ