რუსმა ოლიგარქმა და კერძო სამხედრო კომპანია ვაგნერის ჯგუფის დამფუძნებელმა, ევგენი პრიგოჟინმა, რომელიც ცნობილია როგორც "პუტინის მზარეული", როგორც ჩანს, აღიარა რუსეთის ჩარევა აშშ-ის არჩევნებში.

რატომ არის მნიშვნელოვანი: პროგოჟინი ოფიციალურად დაადანაშაულეს რუსეთში დაფუძნებული "ტროლების ფერმების" დაფინანსებაში, რომლითაც ცდილობენ გავლენა მოახდინონ აშშ-ს პოლიტიკაზე.

  • 2022 წლის ივლისში აშშ-ს სახელმწიფო დეპარტამენტმა დააწესა 10 მილიონი დოლარის ჯილდო მათთვის, ვინც პრიგოჟინის მიერ აშშ-ს არჩევნებში ჩარევაზე ინფორმაციას მოიპოვებდა.
  • კრემლს ამერიკის არჩევნებში ჩარევაში ადანაშაულებენ სულ მცირე 2016 წლიდან, როდესაც რუსეთთან დაკავშირებულმა ჰაკერებმა დემოკრატიული ეროვნული კომიტეტისა და ჰილარი კლინტონის კამპანიის თავმჯდომარის ჯონ პოდესტასგან ელფოსტები გატეხეს.

დეტალები: პროგოჟინის თქმით, რუსეთი ერეოდა, ერევა და გააგრძელებს ჩარევას აშშ-ს დემოკრატიულ პროცესში.

  • ასე უპასუხა პრიგოჟინმა რადიო თავისუფლების უცხოური ბიუროს ჟურნალისტის შეკითხვას გამოცემა Bloomberg-ის ბრალდებასთან დაკავშირებით, რომ რუსი ბიზნესმენი აშშ-ს 8 ნოემბრის შუალედურ არჩევნებში ჩარევას აპირებდა.
  • "ფრთხილად, ზუსტად, ქირურგიულად და ჩვენებურად, ისე, როგორც ვიცით. ჩვენი წერტილოვანი ოპერაციებით ამოვჭრით ორივე თირკმელს და ღვიძლს ერთიანად", — ამბობს პრიგოჟინი.

აშშ: სახელმწიფო დეპარტამენტის განცხადებით, ვაშინგტონისთვის სიახლე არ ყოფილა პრიგოჟინის განცხადება არჩევნებში მოსკოვის ჩარევის შესახებ.

  • სპიკერი ნედ პრაისი აღნიშნავს, რომ ამერიკა არ დაუშვებს არჩევნებში ჩარევას, საიდანაც არ უნდა ეცადონ ამას.
  • პრაისი აცხადებს, რომ აშშ-მ ყველაფერი გააკეთა 2018 წლის არჩევნებში ჩარევის გამოსაძიებლად.
  • ამბობს, რომ საარჩევნო პროცესებსა და ინსტიტუტებში ჩარევისთვის, ქვეყანამ სანქციები დაუწესა პრიგოჟინს. შეიქმნა ინტერნეტის კვლევის სააგენტო, "მავნე კიბერ აქტორების" აღმოსაჩენად.
  • პრაისის განცხადებით, ეს არის დაუსჯელობის დემონსტრირება, რომ ვინმეს სადმე შეუძლია, იამაყოს სხვა სუვერენული ქვეყნის დემოკრატიულ არჩევნებში ჩარევით.

კონტექსტი: 8 ნოემბერს აშშ-ში სენატისა და წარმომადგენელთა პალატის წევრებს ირჩევენ.

  • არჩევნების შედეგები გადაწყვეტს, შეინარჩუნებს თუ არა პრეზიდენტ ბაიდენის დემოკრატიული პარტია უმრავლესობას წარმომადგენელთა პალატასა და სენატში.