კულტურისა და მედიის დამოუკიდებელი პროფკავშირები გილდია, სოციალურ ქსელში თამარ მაყაშვილის შესახებ განცხადებას ავრცელებს.

რატომ არის მნიშვნელოვანი: იმედის ეთერში მსახიობმა თამარ მაყაშვილმა თქვა ფრაზა — "აცვია ხულელი ბავშვივით რაღაცა საშინელი ბეშუმური კაბა" — რასაც საზოგადოების კრიტიკა მოჰყვა.

• მოქალაქეები მსახიობს დისკრიმინაციული განცხადების გამო ბოდიშის მოხდას სთხოვდნენ.
• მაყაშვილმა არაერთხელ მოიხადა ბოდიში და თქვა, რომ ნანობს.
• ამის მიუხედავად, ბათუმის დრამატული თეატრის ხელმძღვანელმა, ქართული ოცნების ყოფილმა დეპუტატმა, ნუკრი ქანთარიამ ის მიმდინარე რეპერტუარიდან მოხსნა.

გილდია აცხადებს, რომ მსახიობის ნათქვამი შეიცავდა იუმორისტული კონტექსტს, მაგრამ არაკორექტული იყო. მათთვის, გაუგებარია, მაყაშვილი ბოდიშის შემდეგ, რას ემსახურება სამხატვრო ხელმძღვანელის ქმედება, მაშინ, როცა მოსაზრება არც თეატრის სცენიდან და არც მასთან დაკავშირებული პლატფორმიდან არ გაჟღერებულა.

• ორგანიზაცია განმარტავს, რომ თეატრს, როგორც დამსაქმებელს აქვს უფლება, გაემიჯნოს მოსაზრებას, მაგრამ არ აქვს უფლება, ჩაერიოს გამოხატვის თავისუფლებაში და გააკონტროლოს, სად რა განცხადებას გააკეთებს მსახიობი.
• "შრომის კოდექსის მე-2 მუხლის თანახმად, შრომითი ურთიერთობა წარმოადგენს სამუშაოს შესრულებას დამსაქმებლის მიერ ორგანიზებულ პირობებში განსაზღვრულ დროსა და ადგილზე, რაც იმას ნიშნავს, რომ ეს ურთიერთობა შემოსაზღვრულია მხოლოდ იმ დროითა და ადგილით, რომელშიც და სადაც სრულდება სამუშაო. შესაბამისად, დამსაქმებელი არ არის უფლებამოსილი, რაიმე ღონისძიება გაატაროს სამუშაო დროისა და ადგილის მიღმა მომხდარ ფაქტებზე", — აცხადებს ორგანიზაცია.

დეტალები: გილდია ხაზს უსვამს, რომ მაყაშვილის დასჯას სოციაურ ქსელებში აქტიურად ითხოვდნენ აჭარის მთავრობის წარმომადგენლები და მუნიციპალიტეტების თანამშრომლები. მათი თქმით, ჩნდება ეჭვი, რომ ქანთარიას გადაწყვეტილებაზე ამან იქონია გავლენა, რაც საფრთხეს უქმნის თეატრის დამოუკიდებლობასა და შემოქმედებით საქმიანობას.

• გილდიას შეფასებით, სამხატვრო ხელმძღვანელის გადაწყვეტილება არის არაპროპორციული და გაუმართლებელი ჩარევა კონსტიტუციით გარანტირებული გამოხატვის თავისუფლებაში და მხოლოდ მსახიობთა დაშინებას ისახავს მიზნად.
• მათივე თქმით, მსახიობის რეპერტუარიდან მოხსნა არის დისკრიმინაცია აზრის გამოხატვის ნიშნით, რაც გამოუსწორებელ ზიანს მიაყენებს არა მხოლოდ მაყაშვილის, არამედ მსახიობების როგორც შრომით უფლებებს, ასევე, გამოხატვის თავისუფლებას.
• "აღნიშნული ქმედება წარმოადგენს პოპულისტურ გადაწყვეტილებას, რასაც შესაძლოა მსუსხავი ეფექტი ჰქონდეს — ის ხაზს უსვამს, რომ მსახიობის ნებისმიერი პირადი ხასიათის განცხადებამ შეიძლება, მისი შრომითი ურთიერთობის შეწყვეტა განაპირობოს", — ვკითხულობთ განცხადებაში.

ორგანიზაცია მიმართავს თეატრის სამხატვრო ხელმძღვანელს, ბათილად ცნოს გადაწყვეტილება და უზრუნველყოს თეატრში შრომითი უფლებების დაცვის მაღალი სტანდარტი.

• "მხარს ვუჭერთ მსახიობ თამარ მაყაშვილს და სოლიდარობისკენ მოვუწოდებთ მის კოლეგებს. დღეს ერთი მსახიობის უფლებების დარღვევა იმოქმედებს ზოგადად კულტურის სფეროში დასაქმებულთა უფლებებზე!" — ვკითხულობთ განცხადებაში.