ამის შესახებ გიორგი ცობეხიამ დღეს, 4 ნოემბერს, პარლამენტში მოსმენის დასრულების შემდეგ განაცხადა.

რატომ არის მნიშვნელოვანი: ცობეხია ერთ-ერთი იყო იმ 19 კანდიდატს შორის, რომლებიც ომბუდსმენის შესარჩევ კონკურსში მონაწილეობენ.

  • გასაუბრების დასრულების შემდეგ მან მხარდაჭერა ომბუდსმენობის სხვა კანდიდატს, სოფო დემეტრაშვილს გამოუცხადა.

დეტალები: ცობეხიამ კანდიდატურის მოხსნამდე მმართველი გუნდი გააკრიტიკა და თქვა, რომ უნდოდა დეპუტატებისთვის ეჩვენებინა მაგალითი, "როგორ შეიძლება პირადი ინტერესი გადავდოთ გვერდზე და გადავდგათ ისეთი ნაბიჯი, რომელიც სახელმწიფო ინტერესს მიესადაგება".

  • "ქართული ოცნების ხელისუფლების წარმომადგენლების მიერ კრიტიკული დამოკიდებულებები, რომლებიც ჩემ მიმართ იყო გაჟღერებული არ არის ის მოცემულობა, რომლითაც სახელმწიფო უნდა განვავითაროთ", — თქვა მან გასაუბრების დასრულების შემდეგ.
  • მისივე თქმით, ქართულ ოცნებას უნდა ისეთი სახალხო დამცველი, რომელიც სრულად იქნება დაცლილი პოლიტიკური შეხედულებებისგან, მას კი ეს თანამდებობა "ასეთ აპოლიტიკურადაც" არ მიაჩნია.
  • "ასე რომ, თქვენი წარმოდგენები რამდენად სამართლიანია და სწორია, ჩემთვის ბევრ კითხვის ნიშანს აჩენს. ზუსტად ვიცი, რომ ჩემს კანდიდატურას მხარდაჭერა არ ექნება", — თქვა მან.