კეტის პერის ვიდეო, რომელშიც მომღერალს თვალი რამდენჯერმე ეხუჭება, ინტერნეტში ვირუსულად გავრცელდა. ვიდეო ფანებმა კეტი პერის ლას-ვეგასის კონცერტზე გადაიღეს, როცა დაინახეს, რომ სცენაზე გამოსული მომღერალი დიდხანს ცდილობდა, თვალი არ დაეხუჭა.

ინტერნეტში ვირუსულად გავრცელებულმა ვიდეომ მაშინვე აზრთა სხვადასხვაობა გამოიწვია. ზოგმა გულშემატკივარმა ჩათვალა, რომ კეტი პერის წამწამების გამო ჰქონდა პრობლემა და ძლიერი წებოს ბრალი იყო, რომ მომღერალს თვალი აუთამაშდა. თუმცა სოციალური ქსელების ზოგიერთი მომხმარებელი უფრო შორს წავიდა და პასუხი კონსპირაციულ თეორიებში იპოვა.

ვიდეოს რამდენჯერმე ნახვის შემდეგ ზოგიერთმა ფანმა ჩათვალა, რომ უფრო დიდ მოვლენასთან გვქონდა საქმე, ვიდრე წამწამების წებოა. კომენტარებში სოციალური ქსელების მომხმარებლებმა დაწერეს, რომ სცენაზე კეტი პერის კლონს ან რობოტს ვხედავთ და მომღერალს თვალის სწორედ ამიტომ უთამაშებს.

"კეტი პერი ნამდვილად რობოტია, რომელიც სცენაზე გაუმართავი იყო", — წერს ტვიტერის ერთ-ერთი მომხმარებელი. ეს მოსაზრება ტიკტოკზეც გაიზიარეს და მომღერლის ფანებმა ივარაუდეს, რომ კეტი პერის რობოტი საკუთარი თავის გადატვირთვას ცდილობდა.

როგორც ჩანს, კონსპირაციულ თეორიებს თავად კეტი პერიც გაეცნო და საპასუხოდ ინსტაგრამზე ვიდეო გამოაქვეყნა. ვიდეოში იმ კადრებს ვხედავთ, რომლებშიც მომღერალს თვალი უთამაშებს. "როცა 2023 წლის კონცერტის თარიღებს ხედავ", — ასეთი აღწერა გაუკეთა კეტი პერიმ ვიდეოს და ლას-ვეგასის მომდევნო გამოსვლების შესახებ გულშემატკივრებს ინფორმაციაც მიაწოდა.