ხანგრძლივი პაუზის შემდეგ ყველასათვის საყვარელი რიანა ახალი სიმღერით დაბრუნდა. მომღერალმა Lift Me Up მარველის ახალი ფილმის Black Panther: Wakanda Forever-ისთვის დაწერა და ის ჩედვიკ ბოუზმენის ხსოვნას ეძღვნება, რომელიც 2020 წელს სიმსივნით გარდაიცვალა.

სიმღერაზე რიანამ, ნიგერიელმა მომღერალმა ტემსმა, შვედმა კომპოზიტორმა ლუდვიგ გორანსონმა და შავი პანტერას რეჟისორმა რაიან გუგლერმა იმუშავეს.

"რაიანთან საუბრის და იმის შემდეგ, რაც რეჟისორის როლში ვნახე ფილმსა და სიმღერაზე მუშაობისას, მინდოდა, რამე ისეთი დამეწერა, რაც ყველა იმ ადამიანთან ჩახუტების მსგავსი იქნებოდა, ვინც ცხოვრებაში დამიკარგავს. შევეცადე, წარმომედგინა, რა გრძნობა იქნებოდა, ახლა მათთვის სიმღერა რომ შემძლებოდა და გამომეხატა, თუ რამდენად მენატრებიან,"— განაცხადა ტემსმა, — "რიანა ჩემთვის შთაგონების წყაროა, ამიტომ ფაქტი, რომ მან შეასრულა ეს სიმღერა, ჩემთვის დიდი პატივია."

ჯერჯერობით რიანას მომდევნო ალბომის შესახებ ინფორმაცია არ ვრცელდება, თუმცა ის კი ვიცით, რომ მომღერალი 2023 წლის ამერიკულ Super Bowl-ზე იმღერებს.