ცნობილმა მწერალმა სალმან რუშდიმ რამდენიმე თვის წინ მომხდარი თავდასხმის შედეგად, ერთ თვალში მხედველობა დაკარგა და ცალ ხელსაც ვეღარ ამოძრავებს. ინფორმაციას რუშდის აგენტი ადასტურებს.

წარმოშობით ინდოელ ინგლისურენოვან მწერალს აგვისტოში, ნიუ-იორკის შტატში დაესხნენ თავს, როცა იგი შემოქმედებითი თავისუფლების შესახებ საჯარო ლექციის წასაკითხად ემზადებოდა. მიყენებული მრავლობითი ჭრილობის გამო, იგი ადგილობრივ საავადმყოფოში ვერტმფრენით გადაიყვანეს. მისი ჯანმრთელობის მდგომარეობის შესახებ სრული ინფორმაცია ამ დრომდე უცნობი იყო, თუმცა, 75 წლის ავტორის წარმომადგენელი, ენდრიუ უაილი, ახლა მედიასთან დეტალებს ჰყვება.

"მძიმე დაზიანებები ჰქონდა და ერთ თვალში მხედველობა დაკარგა", — ამბობს უაილი, — "სამი სერიოზული ჭრილობა მიაყენეს კისრის არეში. მკლავის ნერვების დაზიანების გამო, ვეღარც ცალ ხელს ამოძრავებს. ამასთან, მკერდის და წელის არეში კიდევ 15 ჭრილობა ჰქონდა. ამდენად, ნამდვილად საზარელი თავდასხმა იყო".

აგენტს არ დაუკონკრეტებია, რჩება თუ არა რუშდი საავადმყოფოში. თუმცა, უაილიმ დასძინა, რომ მწერალი გადარჩა და მის სიცოცხლეს ამ დროისთვის საფრთხე არ ემუქრება.

ფოტო: Chris Young / AP

სალმან რუშდი 1980-იანი წლებიდან გამუდმებით იღებდა სიკვდილის მუქარებს — ძირითადად, ირანიდან. ეს მას შემდეგ, რაც ირანის მაშინდელმა ლიდერმა, აიათოლა რუჰოლა ხომეინიმ, მისი მოკვლის მოწოდებით განკარგულება გამოსცა. მიზეზი მწერლის წიგნი, ეშმაკეული აიები, გახდა. მუქარების გამო, რუშდის წლების განმავლობაში მალვა და პოლიციის დაცვის თანხლებით სიარული უწევდა.

მწერლის აგენტის თქმით, რუშდის ამგვარი თავდასხმის შესაძლებლობაზე წინათაც უსაუბრია და საფრთხეს იგი ნებისმიერ ადგილას მოელოდა.

აგვისტოში მომხდარი თავდასხმისთვის ნიუ-ჯერსიში მცხოვრები ლიბანური წარმოშობის კაცი, 24 წლის ჰადი მატარია დაკავებული. მედიაში გავრცელებული ცნობით, პოლიციის ოფიცრებმა მის მობილურ ტელეფონში ირანის რევოლუციის მცველების ერთ-ერთი ლიდერის ფოტო იპოვეს. თავად მატარი თავს უდანაშაულოდ ცნობს.

მართალია, ხომეინის განკარგულება აქამდე ვერ აღასრულეს, თუმცა, ეშმაკეულ აიებთან დაკავშირებული არაერთი ლიტერატორი იქცა სამიზნედ. 1991 წლის ივლისში რომანის იაპონელი მთარგმნელი, ჰიტოში იგარაში, სამშობლოში მოკლეს. წიგნის იტალიელ მთარგმნელს, ეტორე კაპრიოლოს, ცივი იარაღით დაესხნენ თავს მილანში. 1993 წლის ოქტომბერში ეშმაკეული აიების ნორვეგიელ გამომცემელს ესროლეს ოსლოშიც.