ევროკავშირის გადაწყვეტილებით სანქციები ძალაში დღესვე შევა.

რატომ არის მნიშვნელოვანი: რამდენიმე კვირაა, რაც რუსეთი უკრაინულ დასახლებებს ირანული კამიკაძე დრონებით ბომბავს. ამის დამადასტურებელი არაერთი ფოტო-ვიდეო კადრი გავრცელდა.

  • უკრაინის ომში უპილოტო თვითმფრინავების გამოყენება ზაფხულის შემდეგ გაიზარდა, როდესაც მოსკოვმა შაჰიდ-136 თვითმფრინავი ირანიდან შეიძინა (ამას ადასტურებს უკრაინა და აშშ).

დეტალები: ჩეხეთის პრეზიდენტის განცხადებით, ევროკავშირის წევრები შეთანხმდნენ ირანის წინააღმდეგ ახალ სანქციებზე რუსეთისთვის უპილოტო თვითმფრინავების მიწოდების გამო.

  • ევროკავშირის ქვეყნებმა გადაწყვეტილებით, აქტივები გაეყინათ სამ ფიზიკურ პირისა და ერთ სუბიექტს, რომლებიც პასუხისმგებელნი არიან რუსეთისთვის ე.წ. კამიკაძე დრონების მიწოდებაზე.
  • ევროკავშირი "ასევე მზადაა, გააგრძელოს სანქციები კიდევ ოთხ ირანულ სუბიექტზე, რომლებიც უკვე იყვნენ წინა სანქციების სიაში".

ირანი უარყოფს, რომ თეირანი რუსეთს დრონებს აწვდის. ირანის ელჩმა გაეროში ამირ საეიდ ირავანმა თქვა, რომ დასავლეთის ქვეყნები აწარმოებენ "დეზინფორმაციულ კამპანიას ირანის წინააღმდეგ".

  • ირანული დრონების გამოყენებას უარყოფს რუსეთიც. გაეროში რუსეთის მუდმივი წარმომადგენლის პირველმა მოადგილემ, უშიშროების საბჭოს სხდომის შემდეგ გამართულ პრესკონფერენციაზე ჟურნალისტებს განუცხადა, რომ უკრაინის წინააღმდეგ გამოყენებული ყველა უპილოტო თვითმფრინავი რუსულია და არა ირანული.

უკრაინაინის საგარეო საქმეთა მინისტრის, დმიტრო კულებას განცხადებით, მიესალმება ევროკავშირის სწრაფ ქმედებას.

  • კულებამ გუშინ, 19 ოქტომბერს უკრაინის პრეზიდენტს, ვოლოდიმირ ზელენსკის ირანთან დიპლომატიური ურთიერთობის გაწყვეტა შესთავაზა.

აშშ: სახელმწიფო დეპარტამენტის განცხადებით, აშშ ეთანხმება საფრანგეთისა და დიდი ბრიტანეთის შეფასებას, რომ დრონები გაეროს უშიშროების საბჭოს რეზოლუციას არღვევს.

  • აშშ-ის სახელმწიფო დეპარტამენტის სპიკერმა, ნედ პრაისმა 19 ოქტომბერს განაცხადა, რომ აშშ-ს აქვს მტკიცებულება, რომ რუსეთი იყენებს ირანულ თვითმფრინავებს უკრაინაზე თავდასხმისთვის.
  • აშშ ასევე გამოთქვამს მზადყოფნას, ირანს რუსეთისთვის უპილოტო საფრენი აპარატების მიწოდების გამო სანქციები დაუწესოს.