პრეზიდენტი გიორგი მარგველაშვილი განცხადებას ავრცელებს, სადაც უსამძიმრებს და ღრმა მწუხარებას გამოთქვამს ეგვიპტეში მომხდარი ტერორისტული აქტის გამო:

"ღრმა მწუხარებას გამოვთქვამ ეგვიპტის სამხრეთ ნაწილში ავტობუსზე განხორციელებული შეიარაღებული თავდასხმის გამო, რომელსაც უდანაშაულო ადამიანთა მსხვერპლი მოჰყვა. ვუსამძიმრებთ დაღუპულთა ოჯახებს და თანადგომას ვუცხადებთ ეგვიპტელ ხალხსა დახელისუფლებას".

ეგვიპტური მედიის ცნობით, სულ ცოტა, 23 ადამიანი დაიღუპა, ხოლო 25 დაშავდა ცენტრალურ ეგვიპტეში, ქაიროდან 250 კილომეტრის მოშორებით, მინიას პროვინციაში შეიარაღებული თავდასხმის შედეგად. შეიარაღებული პირი თავს დაესხა ავტობუსს, რომელსაც ეგვიპტელი ქრისტიანები (კოპტები) ეკლესიაში გადაჰყავდა. ბოლო ცნობებით, ყველა გარდაცვლილი ქრისტიანია.

შეგახსენებთ, რომ გასული თვეების განმავლობაში, ეს არ არის ქრისტიანებზე თავდასხმის პირველი შემთხვევა. 9 აპრილსს ტანტასა და ალექსანდრიაში ქრისტიანულ ეკლესიებზე თავდასხმას სულ 46 ადამიანი შეეწირა. ტერაქტებზე პასუხისმგებლობა ტერორისტულმა დაჯგუფება ისლამურმა სახელმწიფომ აიღო.