ბიზნესმენის ტვიტით გახარებული არიან ექსპრეზიდენტი და უსაფრთხოების საბჭოს წევრი დმიტრი მედვედევი და ვლადიმერ პუტინის პრესსპიკერი დმიტრი პესკოვი.

რატომ არის მნიშვნელოვანი: მასკი აქამდე უკრაინის მხარდამჭერად მიიჩნეოდა, ბოლო განცხადებებით, კი უკრაინელებს იმედი გაუცრუა.

  • მან ტვიტერზე გამოკითხვები ჩაატარა "უკრაინა-რუსეთის მშვიდობაზე", ყირიმისა და დონბასის რუსეთთან მიერთებასა და ხელახალი რეფერენდუმის საჭიროებაზე, რაც კრემლის პროპაგანდას ასხამს წყალს.

  • შედეგად Twitter-ზე კრიტიკული გამოხმაურებები და უკრაინის ოფიციალური პირების პასუხი მიიღო.

  • ვოლოდიმირ ზელენსკიმ საპასუხო გამოკითხვაც კი შესთავაზა: "რომელი ილონ მასკი უფრო მოგწონთ: 1. რომელიც მხარს უჭერს უკრაინას. 2. რომელიც მხარს უჭერს რუსეთს".

ბიზნესმენს ურჩიეს არ ჩარეულიყო პოლიტიკაში. ეს ქმედება კი შეაფასეს, როგორც "მორალური იდიოტიზმი", კრემლის პროპაგანდის გამეორება და უკრაინის გამბედაობისა და თავგანწირვის ღალატი.

  • "ეს არის ყირიმის ვიკიპედიაზე რამდენიმე წუთის დათვალიერება პუტინის სისხლიანი ომის ამჟამინდელი საშინელი რეალობის შესახებ", — დაწერა გარი კასპაროვმა.
  • კონგრესმენმა ადამ კინზინგერმა კი იხუმრა, რომ რადგან მასკი მოლაპარაკებებში ჩაერთო, მან გადაწყვიტა მანქანების ბიზნესი დაიწყოს.
  • "ძვირფასო ილონ მასკ, როდესაც ვიღაც ცდილობს, მოიპაროს თქვენი Tesla-ს ბორბლები, ეს არ აქცევს მას მანქანის ან ბორბლების კანონიერ მფლობელად, მიუხედავად მათი მტკიცებისა, რომ ამას ორივემ მხარი დაუჭირა. უბრალოდ ვამბობ", — წერს ლიეტუვას პრეზიდენტი.
  • გარდა ამისა, მასკს დასცინეს და უამრავი მემე დაუკომენტარეს.

რუსებმა შეაქეს. მაგალითად, დმიტრი მედვედევი ფიქრობს, რომ ის ყოჩაღია.

  • "ეკუთვნის ოფიცრის რიგგარეშე წოდების მინიჭება. თუმცა ნაადრევად გაიშიფრა. მისი შემდეგი პოსტი იქნება რამე მსგავსი: "უკრაინა ხელოვნურად შექმნილი სახელმწიფოა", — დაწერა მან ტელეგრამზე.

  • კრემლს კი "ძალიან დადებითად მიაჩნია", რომ მასკის მსგავსი ადამიანი ეძებს გამოსავალს უკრაინის გარშემო შექმნილი სიტუაციიდან.
  • "პროფესიონალი დიპლომატებისგან განსხვავებით, მასკი ცდილობს მშვიდობის მიღწევის გზები მოძებნოს. და რუსეთის პირობების შესრულების გარეშე მშვიდობის მიღწევა აბსოლუტურად შეუძლებელია", — განაცხადა დმიტრი პესკოვმა.