უკრაინის პრეზიდენტმა, ვოლოდიმირ ზელენსკიმ ვიდეომიმართვაში განაცხადა, რომ ზელენსკის განცხადებით, ფრონტზე არსებული ვითარების შესახებ მალე კარგი ამბები გახდება ცნობილი.

რატომ არის მნიშვნელოვანი: 29 აგვისტოს უკრაინა კონტრშეტევაზე გადავიდა და ამ დროისთვის უკვე აქვს გარკვეული წარმატება, როგორც სამხრეთში ასევე აღმოსავლეთით.

  • ომის შემსწავლელი ინსტიტუტის განცხადებით, უკრაინის შეტევაზე გადასვლამ ომის მიმდინარეობა შეცვალა, თუმცა ბრძოლები 2023 წლამდე გაგრძელდება.
  • შეტევითი ოპერაციის დაწყებიდან დღემდე უკრაინელებმა ფრონტის ხაზის 12 კილომეტრით გადაადგილება მოახერხეს.
  • მათივე თქმით, ფრონტის ხაზის სტაბილიზაციის შემდეგ, უკრაინის ჯარს ახალი შეტევების დაწყება მოუწევს.

დეტალები: უკრაინის გენერალური შტაბის მონაცემებით, ერთი დღის განმავლობაში უკრაინელმა სამხედროებმა ასობით ოკუპანტი მოკლეს.

  • მათივე ცნობით, ომის დაწყებიდან დღემდე 58 150 რუსი ჯარისკაცი დაიღუპა, ასევე, განადგურებულია 2 312 ტანკი, 262 თვითმფრინავი, 224 ვერტმფრენი.
  • გასული ღამის განმავლობაში რუსებმა დაბომბეს სუმის, ხარკოვის, დნეპროპეტროვსკის, ზაპოროჟიეს ოლქები — ბრძოლები იყო ლუგანსკისა და დონეცკის რაიონებშიც.

  • 27 სექტემბერს ოკუპანტებმა ნიკოლაევზე სარაკეტო იერიში მიიტანეს — თავს დაესხნენ სკოლას, სადაც მშვიდობიანი მოსახლეობა აფარებდა თავს. შედეგად დაიღუპა 5, ხოლო დაიჭრა 10 ადამიანი.

კონტრშეტევა: ბრიტანეთის დაზვერვის ინფორმაციით, ბოლო დღეებში უკრაინამ ქვეყნის ჩრდილო-აღმოსავლეთში კონტრშეტევა გააქტიურა.

  • მათი თქმით, ქვედანაყოფები ნელა, მაგრამ მაინც მიიწევენ წინ, სულ მცირე 2 მიმართულებით, მდიარე ოსკილისა და სივერსკის დონეცის აღმოსავლეთ სანაპიროებზე.
  • აღნიშნავენ, რომ რუსეთი ადრინდელთან შედარებით მეტად აძლიერებს თავდაცვას, ბახმუტში კი წარუმატებელ შეტევებს აგრძელებს.

ხერსონი: ოლქში ვითარება კვლავ რთულია, გრძელდება საომარი მოქმედებები. ამის შესახებ რეგიონის ხელმძღვანელობა ავრცელებს.

  • მათივე ცნობით, მტრებმა დაბომბეს რამდენიმე ქალაქი, მათ შორის, ივანოვკა, ოსოკოროვნა, ნოვოვორონცოვკა — დაზიანებულია სამოქალაქო ინფრასტრუქტურა, არიან დაშავებულები.
  • უკრაინა აცხადებს, რომ ოკუპანტები ადგილობრივების კონტროლს აძლიერებენ და მობილურებსაც კი უმოწმებენ.

ISW-ის ანგარიშის მიხედვით, დონეცკის ოლქში მდებარე ქალაქ ლიმანთან ახლოს სასტიკი ბრძოლები გრძელდება.

  • უკრაინის პრეზიდენტის აპარატის მრჩეველი, ალექსეი არესტოვიჩი ამბობს, რომ უახლოეს მომავალში უკრაინულმა ჯარებმა შესაძლოა, ლიმანს ალყა შემოარტყან.