პარლამენტის ადამიანის უფლებათა დაცვის კომიტეტმა 2004-2012 წლებში წამებისა და არაადამიანური მოპყრობის ფაქტებზე ანგარიში წარადგინა. ანგარიშში ძირითადი აქცენტები, აღნიშუნულ პერიოდში, სისტემურ დანაშაულზე, პატიმრების წამებასა და არაადამიანურ მოპყრობაზეა გაკეთებული.

დოკუმენტი გაეროს რეკომენდაციით შექმნილმა სპეციალურმა ჯგუფმა ადამიანის უფლებების დაცვის კომიტეტში შესული განცხადებების, მოქალაქეების გამოკითხვის, პროკურატურისა და სასამართლოს მიერ მიწოდებული დოკუმენტაციის საფუძველზე შეადგინა.

როგორც ღონისძიებაზე პრემიერმინისტრმა, გიორგი კვირიკაშილმა განმარტა, ანგარიშის შედგენა არა მხოლოდ ქართული საზოგადოების მოთხოვნის, არამედ გაეროს ადამიანის უფლებათა კომიტეტის დასკვნისა და რეკომენდაციების საფუძველი მოამზადეს:

"ეს არის ათასობით საქმე, რომლის გამოც ბევრი პირი მიცემულია პასუხისგებაში. მრავალი საქმე სასამართლოშია გადაცემული. არის საქმეები, რომელთა გამოძიება ჯერ კიდევ არ დასრულებულა, ამიტომ დარწმუნებული ვარ, რომ დამნაშავეები პასუხს აგებენ კანონის სრული სიმკაცრით".

კვირიკაშვილის განმარტებით, გამოძიება და სამართალწარმოება თავისი გზით, საქართველოს მოქალაქეების ცხოვრება კი განვითარების გზით უნდა წავიდეს:

"ჩვენ უნდა ვიყუროთ და ვიაროთ წინ, თავი დავაღწიოთ უმძიმეს წარსულს იმისთვის, რომ არ გავხდეთ ამ სისასტიკის მძევალი. სისასტიკის, რომელიც ყველამ ერთად გადავიტანეთ. დღეს ჩვენ ვადგავართ დემოკრატიული განვითარების, ევროპული, ცივილიზებული სახელმწიფოს მშენებლობის გზას".

კვირიკაშვილის განმარტებით, დღეს ხელისუფლების ყოფილი წარმომადგენლებისგან ხშირად ისმის ბრალდებები ამჟამინდელი ხელისუფლების წინააღმდეგ, თუმცა ამ ადამიანებმა ზუსტად იციან, რომ ყველაზე რადიკალური შეფასებებისთვისაც კი მათ სახელმწიფო მანქანა არ დაუპირისპირდება:

"ისინი შანტაჟის და ანგარიშსწორების მსხვერპლნი არ გახდებიან. ეს არის ჩვენი ხელისუფლების და ჩვენი ხალხის მონაპოვარი. ამით გამოირჩევა ჩვენი ხელისუფლების ხელწერა. ანგარიშსწორება და შურისძიება გუშინდელი დღეა".

კვირიკაშვილის თქმით, ხელისუფლების მიზანია, რომ საზოგადოებამ იცხოვროს ისეთ ქვეყანაში, სადაც აღარ იქნებიან ჯალათები და მსხვერპლი.