ამის შესახებ უკრაინის პრეზიდენტმა CBS News-თან ინტერვიუში განაცხადა.

რატომ არის მნიშვნელოვანი: 16 სექტემბერს უკრაინის გათავისუფლებულ ქალაქ იზიუმთან ახლოს აღმოაჩინეს მასობრივი საფლავი, სადაც 400-ზე მეტი ცხედარი იყო.

  • უკრაინის ოფიციალური პირების თქმით, სამარხში უმეტესობა მშვიდობიანი მოქალაქეები იყვნენ, იპოვეს ბავშვების ცხედრებიც.
  • რუსეთი უარყოფს საკუთარ დანაშაულს და მასობრივ საფლავებზე ინფორმაციას სიცრუეს უწოდებს.

დეტალები: ზელენსკის თქმით, ახალ საფლავებში რამდენიმე ასეული ცხედარია.

  • პრეზიდენტმა ხაზი გაუსვა, რომ იზიუმი პატარა ქალაქია და ძალიან დიდი დანაკარგი განიცადა.

  • მისივე თქმით, პირველ მასობრივ საფლავში მთელი ოჯახი იყო დაკრძალული, რომლებიც აწამეს და მოკლეს: "მოზარდები, კაცები და ქალები და პატარა ბავშვები თავებში ტყვიებით. მათი სხეულის ზოგიერთი ნაწილი დაკარგული იყო".

საერთაშორისო გამოხმაურებები: აშშ-ის უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ იზიუმში თავდაპირველად აღოჩენილ სამარხს შემზარავი უწოდა.

  • ესტონეთის პრემიერმინისტრი ამბობდა, რომ იზიუმი არის რუსული ოკუპაციის სახე: "ქალაქები გადაიქცა მასობრივ სასაფლაოდ".
  • საფრანგეთის პრეზიდენტმა, ემანუელ მაკრონმა აღნიშნა, რომ დამნაშავეები პასუხს აგებენ თავიანთ ქმედებებზე.
  • საგარეო პოლიტიკისა და უსაფრთხოების საკითხებში ევროკავშირის უმაღლესმა კომისარმა, ჯოზეფ ბორელმა განაცხადა, რომ რუსეთის აგრესიული ომი უკრაინის წინააღმდეგ სისხლისა და ნგრევის კვალს ტოვებს.

ბუჩა: 2 აპრილს უკრაინულმა ჯარმა ოკუპანტებისგან კიევის ოლქი გაათავისუფლა.

  • მედიაში გავრცელდა ფოტოები ბუჩას ქუჩებიდან, რომელიც სავსე იყო ცხედრებით — მათ ნაწილს ხელები ჰქონდათ შეკრული, ნაწილის გვერდით ველოსიპედები ეყარა, ნაწილი კი რამდენიმე კვირის წინ იყო მოკლული.
  • აღმოჩენილია არაერთი მასობრივი საფლავი, ნაწამები და მოკლული ადამიანებით.