მანჩესტერ არენაზე მომხდარ აფეთქებაზე პასუხისმგებლობა ტერორისტულმა დაჯგუფებამ, ე.წ. ისლამურმა სახელმწიფომ აიღო. მანამდე, ბრიტანეთის პოლიციამ 23 წლის კაცი დააკავა, თავდასხმასთან სავარაუდო კავშირისთვის. BBC-ის ინფორმაციით, თვითმკვლელი ტერორისტი მარტო იყო, როდესაც ხელნაკეთი ნაღმი აამოქმედა ამერიკელი მომღერლის, არიანა გრანდეს კონცერტის დასასრულს.

დიდ ბრიტანეთში, მანჩესტერ არენაზე, არიანა გრანდეს კონცერტის შემდეგ მომხდარი აფეთქების შედეგად 22 ადამიანი დაიღუპა და დაშავდა 59. BBC-ის ცნობით, გარდაცვლილთა შორის არიან ბავშვები.

აფეთქებისას, კონცერტზე დამსწრეები, მათ შორის უმრავლესობა გრანდეს ახალგაზრდა ფანები, მანჩესტერ არენას ტოვებდნენ.