თბილისის მერიის პრესსამსახურის ცნობით, ზედამხედველობის საქალაქო სამსახურის წარმომადგენლებმა მეტროსადგურ "დიდუბისა" და გადასასვლელი ხიდის მიმდებარე ტერიტორიიდან გარევაჭრობისთვის განკუთვნილი კონსტრუქციები გაიტანეს, რის შემდეგაც ტერიტორია დაასუფთავეს. როგორც მერია ამბობს, მათ ამის შესახებ გარემოვაჭრეები რამდენიმე დღით ადრე გააფრთხილეს.

თბილისის მერის მოადგილის, გიგა ნიკოლეიშვილის განცხადებით, ამით დედაქალაქში გარევაჭრობის საწინააღმდეგო ღონისძიებები დასრულებულია:

"ერთდროულად ორ ადგილზე მიმდინარეობს გაწმენდითი ღონისძიებები. ეს არის მეტროსადგურ დიდუბის და გადასასვლელი ხიდის ტერიტორია. ამ ადგილებიდან გააქვთ რკინის კონსტრუქციები, რომელიც განკუთვნილი იყო გარევაჭრობისათვის. ბაზრის დირექციასთან მიღწეულია შეთანხმება, რომ 160 გარემოვაჭრე ბაზრის ტერიტორიაზე, 6 თვის განმავლობაში უსასყიდლოდ შეძლებს საქმიანობის გაგრძელებას."

მერიამ გარევაჭრობას ბრძოლა მიმდინარე წლის მარტში გამოუცხადა და ეტაპობრივად, ქალაქის ყველა უბნიდან გაიტანეს გარევაჭრობისთვის განკუთვნილი ჯიხურები. ადამიანთა ნაწილი, რომელიც ოჯახებს გარევაჭრობით არჩენდა, On.ge-სთან საუბარში ამბობს, რომ ბაზრობების დირექციის ნაწილი, დაპირების მიუხედავად, ფულს ახდევინებს, ნაწილი კი ადგილის საფასურს ჯერ არ იხდის. გარდა ამისა, მათ თითქმის იგივე პირობებში - ბაზრობების ტერიტორიაზე, ღია ცის ქვეშ უწევთ პროდუქციით ვაჭრობა, როგორც ეს გარევაჭრობისას ხდებოდა.

ამავე თემაზე: