შესწორება: თავდაპირველად მასალის სათაური იყო "მოსახლეობის უმრავლესობა თვლის, რომ მთავრობამ EU-ს კანდიდატის სტატუსის მისაღებად საკმარისი არ გააკეთა", რაც კვლევის შედეგებიდან გამომდინარე ფაქტობრივი უზუსტობაა. მასალა ჩასწორებულია. On.ge ბოდიშს უხდის მკითხველს შეცდომაში შეყვანისთვის.

ევროკავშირმა წევრობის კანდიდატის სტატუსი ასოცირებული ტრიოს ორ ქვეყანას მიანიჭა, საქართველოს კი 12 პირობა და ამ პირობების შესასრულებლად 6-თვიანი ვადა მისცა.

რატომ არის მნიშვნელოვანი: ეროვნულ-დემოკრატიული ინსტიტუტის (NDI) ახალი კვლევის მიხედვით, გამოკითხული მოსახლეობის 62%-ს სმენია ევროპული საბჭოს გადაწყვეტილების შესახებ.

• NDI კვლევის მიხედვით, მათგან ვისაც ამ გადაწყვეტილების შესახებ სმენია, 56% თვლის, რომ მთავრობამ საკმარისი არ გააკეთა იმისთვის, რომ საქართველოს ევროკავშირის კანდიდატი ქვეყნის სტატუსი მიეღო.
• 32%-ის აზრით, მთავრობამ ყველაფერი გააკეთა, ხოლო 7% ამბობს, რომ არც ერთს არ ეთანხმება.

გარდა ამისა, კვლევაში ნათქვამია, რომ გამოკითხული მოსახლეობის 71% თვლის, რომ ევროპული საბჭოს რეკომენდაციების შესრულება მნიშვნელოვანია, თუმცა მოქალაქეების მხოლოდ მესამედი მოელის, რომ მთავრობა ამ პირობებს შეასრულებს.

• ასევე გამოკითხულთა 70%-ის აზრით, ამ პროცესში ოპოზიციისა და სამოქალაქო სექტორის ჩართულობა მნიშვნელოვანია, თუმცა ამას ნაკლებად მოელიან.

დეტალები: კვლევის მიხედვით, პროდასავლური კურსის მხარდაჭერა მნიშვნელოვნად გაიზარდა.

• ასევე, უმრავლესობა დარწმუნებულია, რომ საქართველო ევროპული და ევრო-ატლანტიკური ინტეგრაციით მეტ სარგებელს მიიღებს, ვიდრე რუსეთთან ახლო ურთიერთობით.

ევროკავშირი: კვლევის მიხედვით, მცირედი ვარდნის მიუხედავად, ევროკავშირის მხარდაჭერა კვლავ მაღალია.

• კითხვაზე, მისაღებია თუ არა საქართველოს მთავრობის გაცხადებული მიზანი საქართველო გახდეს ევროკავშირის წევრი, მოსახლეობის 75%-მა უპასუხა, მისაღებია, 14%-ისთვის მისაღებია, 10% კი აცხადებს, რომ არ იცის;
• კვლევაში ევროკავშირის მხარდაჭერის მთავარ მოტივად კვლავ სამუშაო ადგილები და უსაფრთხოება სახელდება;
• NDI წერს, რომ 2019 წელთან შედარებით, გაზრდილია იმ ადამიანების რიცხვი, რომლებიც ევროკავშირში გაწევრიანების ხელის შემშლელ ფაქტორად ხელისუფლების მხრიდან პოლიტიკური ნების ნაკლებობას ასახელებს.

NATO: NDI-ის კვლევის მიხედვით, ალიანსში გაწევრიანების მხარდაჭერა სტაბილურად მაღალია.

• გამოკითხული მოსახლეობიდან უმრავლესობის აზრით, საქართველოს ნატოში გაწევრიანებას ყველაზე მეტად რუსეთი და ოკუპირებული ტერიტორიები უშლის ხელს.

მეთოდოლოგია: კვლევა ჩატარებულია NDI-ის დაკვეთით CRRC საქართველოს მიერ, დიდი ბრიტანეთის მთავრობის UK aid-ის ფინანსური ხელშეწყობით.

• აღნიშნული ანგარიში 14 ივლისიდან-15 აგვისტომდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით).
• აგვისტოში ჩატარებული გამოკითხვა სულ 2 104 დასრულებულ ინტერვიუს მოიცავს;
• საშუალო ცდომილების ზღვარი კვლევაში +/- 2 პროცენტია.