ელექტრონული პეტიციებისთვის მთავრობა პორტალს ქმნის. პორტალის ichange.gov.ge-ს შექმნის შესახებ საქართველოს მთავრობამ დადგენილება 2017 წლის 18 მაისს გამოსცა. დადგენილების მიღებიდან 30 დღეში კი, საქართველოს მთავრობის ადმინისტრაციის ხელმძღვანელი კომისიაში შემავალი ექსპერტების სიას განსაზღვრავს.

საქართველოს მთავრობის წინაშე ელექტრონული პეტიციის ინიცირება და ელექტრონულ პეტიციაზე ხელმოწერის უფლება აქვს საქართველოს ყველა სრულწლოვან მოქალაქეს. ამისთვის აუცილებელი იქნება მოქალაქის ichange-ის პორტალზე დარეგისტრირება.

როგორც მთავრობის ელექტრონული მმართველობის თანამშრომელი, გიორგი პაიჭაძე ამბობს, ვებგვერდი დაახლოებით ერთი წლის წინ დამზადდა და შესაბამისი კომისიის დაკომპლექტების შემდეგ ჩაეშვება. მისივე ინფორმაციით, მის დამზადებაზე სახელმწიფოს დამატებითი ხარჯები არ გაუწევია და სსიპ მონაცემთა დაცვის სააგენტომ დაამზადა.

პაიჭაძის თქმით, ამ დრომდე ვებგვერდი იმ მიზეზით არ ჩაეშვა, რომ მას მთავრობის სხვადასხვა უწყების წარმომადგენლებს აცნობდნენ.

პეტიცია არ მიიღება და არ გამოქვეყნდება თუ:

• იმ მოსაზრების/წინადადებების შემცველია, რომელთა თემატიკაც არ განეკუთვნება საქართველოს მთავრობის კომპეტენციას;
• გარკვევით და ნათლად არ გადმოსცემს მოსაზრებას, იდეას/შეთავაზებას;
• პოლიტიკური, პროპაგანდის, კომერციული შინაარსის შემცველია;
• მოიცავს შეურაცხმყოფელ, უხამს, გამომწვევი შინაარსის განაცხადებს, ან ხუმრობის მიზნითაა ინიციირებული;
• სიძულვილის, დისკრიმინაციის, ძალადობის საფრთხის, ინდივიდის ან რომელიმე ჯგუფისთვის ზიანის მომტანი მოწოდებების შემცველია;
• საქართველოს კონსტიტუციური წყობილების დამხობის ან ძალადობით შეცვლის, ქვეყნის დამოუკიდებლობის ხელყოფისა და ტერიტორიული მთლიანობის დარღვევის ან ისეთი მოწოდების შემცველია, როგორიც არის ომისა და ძალადობის პროპაგანდა, აღვივებს ეროვნულ, კუთხურ, რელიგიურ ან სოციალურ შუღლს და ქმნის ამ ქვეპუნქტით გათვალისწინებული ქმედების აშკარა, პირდაპირ და არსებით საფრთხეს, ასევე საქართველოს კანონმდებლობის დაუმორჩილებლობის მოწოდებების შემცველია;
• ეხება მხოლოდ ერთი კონკრეტული პიროვნების ინტერესებს, პერსონალურ გარემოებას ან საკითხს;
• ეწინააღმდეგება საქართველოს კანონმდებლობის მოთხოვნებს.

პეტიციიაში მოცემულ შინაარსსა და განხილვისთვის საჭირო უწყებებს სპეციალური კომისია არჩევს. კომისია გადაწყვეტილებას დამსწრეთა უმრავლესობით იღებს.

კომისიის შემადგენლობაში შედიან:

• საქართველოს მთავრობის ადმინისტრაციის იურიდიული დეპარტამენტის წარმომადგენელი;
• საქართველოს მთავრობის ადმინისტრაციის კომუნიკაციის დეპარტამენტის წარმომადგენელი;
• საქართველოს მთავრობის ადმინისტრაციის სამდივნოს ადამიანის უფლებათა დაცვის საკითხებში (სამსახურის) წარმომადგენელი;
• საქართველოს მთავრობის ადმინისტრაციის პოლიტიკის ანალიზის, სტრატეგიული დაგეგმვისა და კოორდინაციის დეპარტამენტის სამთავრობო გეგმებისა და ინოვაციების სამსახურის წარმომადგენელი;
• საქართველოს მთავრობის ადმინისტრაციის პოლიტიკის ანალიზის, სტრატეგიული დაგეგმვისა და კოორდინაციის დეპარტამენტის ელექტრონული მმართველობის სამსახურის წარმომადგენელი;
• საქართველოს ფინანსთა სამინისტროს წარმომადგენელი.

ელექტრონული პეტიციის განსახილველად და მასზე ოფიციალური პასუხის მისაღებად საჭიროა, ელექტრონულ პეტიციას მხარი დაუჭიროს არანაკლებ 10 ათასმა მომხმარებელმა.

ხელმოწერების შესაგროვებლად გამოქვეყნებიდან 30-დღიანი ვადაა დაწესებული. თუ ამ დროის განმავლობაში ხმების საჭირო რაოდენობა ვერ მოგროვდება პეტიცია ვადაგასულად მიიჩნევა და ხელმოწერების დამატება შეუძლებელი იქნება.