ამის შესახებ სახელმწიფო უსაფრთხოების სამსახურის ყოფილი მაღალჩინოსანი ახალ წერილში საუბრობს.

რატომ არის მნიშვნელოვანი: გოგაშვილი ამბობს, რომ გომელაური FSB-ს აგენტებს 2016-2017 წლებში შეხვდა, როცა ის სუს-ის უფროსი იყო.

• აცხადებს იმასაც, რომ არალეგალური და კონტრაბანდული ტვირთების მოძრაობის უზრუნველყოფაში ჩართულია სუსი, შსს, ფინანსთა სამინისტრო, ეკონომიკის სამინისტრო.
• ამტკიცებს, რომ არსებობს დანაშაულის ნიშნების შემცველი სისტემა, იმ შემთხვევაში თუ გადასატანია რაიმე ტვირთი: "მიდის შეტყობინებები საპატრულო პოლიციასა და საბაჟო დეპარტამენტში, რათა არ მოხდეს მათი შემოწმება, ხანდახან ტვირთები ისე გადის, რომ საერთოდ არ ფიქსირდება საზღვარზე".

დეტალები: გოგაშვილი ჰყვება, რომ 2016 წელს ბიძინა ივანიშვილის დავალებით იმყოფებოდა ვლადიკავკაზში FSB-ს საიდუმლო ბაზაზე, რადგან, მისი მტკიცებით, ირაკლი ღარიბაშვილის შეცვლის შემდეგ "კომუნიკაციაში იყო წყვეტა და საჭირო იყო ახლად შექმნილი სამსახურის, ანუ სუს-ის ხელმძღვანელობასთან გაცნობა".

• იხსენებს, რომ ბაზაზე FSB-ს გენერალი შეხვდა, საუბარი 30 წუთი გაგრძელდა და "უფროსების" შეხვედრა განიხილეს.
• აცხადებს, რომ შეხვედრის მიზანი იყო "ქვედა დონის მოკავშირე ოფიცრების ურთიერთობის აწყობა, შესაფერისი სანდო პირების გამოყოფა, მათი ერთმანეთთან დაკავშირება, ასევე არალეგალური და კონტრაბანდული ტვირთებისათვის უსაფრთხო დერეფნების უზრუნველყოფა".
• გარდა ამისა, "მათი რეკომენდაციით რუსეთის მოქალაქეებზე საქართველოს მოქალაქეობის მინიჭება, ბიზნესის დაწყებაში დახმარება, ასევე საქართველოში მყოფი რუსეთის მოქალაქეების, რომლებიც არ იყვნენ სასურველი პირები და იძებნებოდნენ, მათი არალეგალურად გადაცემა რუსეთისათვის".

გომელაურისა და ბორტნიკოვის შეხვედრა: როგორც გოგაშვილი ამბობს, შეხვედრა რუსეთში, ვლადიკავკაზში შედგა და 3 საათი გაგრძელდა. მისივე თქმით, თავად არ ესწრებოდა.

• გოგაშვილის მონათხრობით, ვახტანგ გომელაური ჯერ გაემგზავრა მანქანით, მაგრამ თოვლის ჩამოწოლის გამო გზაზე შეფერხება იყო და დაბრუნდა — შემდეგ ბოინგ 737 ჩარტერული რეისით გადაფრინდა.
• მისივე თქმით, გამგზავრების საკითხში ჩართული იყო ნინო გიორგობიანიც, რომელიც სხვადასხვა დროს შსს-სა და სუს-ში მუშაობდა, ახლა კი მთავრობის ადმინისტრაციის სტრატეგიული კომუნიკაციების დეპარტამენტის უფროსია.
• მან მოგვიანებით კიდევ ერთი წერილი გაავრცელა და დაწერა, რომ აქვს მტკიცებულებები — ფოტო, ვიდეო, აუდიომასალა.
• აცხადებს, რომ აირზენას ჩარტერით ვლადიკავკაზში გადაფრენის შემდეგ, "მოსმენაზე დასვეს" ორივე პილოტი, "რადგან გადაგვეზღვია ინფორმაციის გაჟონვა და რამდენიმე თვე ვაკონტროლებდით".

მომდევნო შეხვედრები: გოგაშვილი ამტკიცებს, რომ გომელაურისა და ბორტნიკოვის შეხვედრის შემდეგ, 2017 წლის ნოემბერში საქართველოში უმასპინძლეს ორ FSB-ს გენერალს, სედოვსა და ბესედას.

• "მათთან შეხვედრა და სუფრა მომზადებული იყო კონსპირაციულად მცხეთაში მდებარე ვახტანგ გომელაურის კუთვნილ რესტორანში. მომსახურე პერსონალი შედგებოდა ჩემი თანამშრომლებისგან"
• "საუბარი შედგა ძირითადად წარმატებულ ურთიერთობებზე, შემდეგ გავემგზავრეთ და დავათვალიერებინეთ მეტეხის ტაძარი. გასაცილებელი სუფრა მომზადდა მთაწმინდის ანდერვილში".
• "იმავე წელს, დეკემბრის თვეში, ჩვენ ოფიციალური მიწვევით ვიმყოფებოდით მინსკში, სადაც ერთმანეთს კიდევ ერთხელ შეხვდნენ ვახტანგ გომელაური და ბორტნიკოვი. საუბრის შინაარსი არ ვიცი".

კონტრაბანდული ტვირთი: გოგაშვილი იხსენებს, რომ 2017 წელს, სხვადასხვა დროს უცხოელი პარტნიორებისაგან მიიღეს ინფორმაცია ორი ტანკერის შესახებ, რომელიც მოდიოდა რუსეთიდან ფოთში. მისი თქმით, უნდა შეცვლილიყო საბუთები, თითქოს ტვირთი საქართველოდან მიდიოდა.

• "სინამდვილეში გემი 80%-ით სავსე იყო ამონიუმის ნიტრატით, დანარჩენი უნდა გადავსებულიყო საქართველოში და გაგზავნილიყო ლიბანის პორტის გავლით ბაშარ ალ ასადთან სირიაში", — ამბობს ის.

• მისივე თქმით, კიდევ იყო ორი სატვირთო ლარსიდან შემომავალი — "მოწოდებული ინფორმაციით იგი დატვირთული იყო აკრძალული ტვირთით (რეზინ ექსჩეინჯი) და იგზავნებოდა ირანში"

• გოგაშვილის წერს, რომ კომუნიკაცია ჰქონდა გიორგი გახარიასთან და ამ შემთხვევაში იძულებული იყვნენ ტვირთები გაებრუნებინათ უკან, რადგან ინფორმაცია უცხოელების მოწოდებული იყო და რეაგირების გარეშე ვერ დატოვებდნენ.

• "ამ ტვირთების უსაფრთხო მოძრაობას უზრუნველყოფენ ერთმანეთთან კავშირში მყოფი ქართველი და რუსი ძალოვანი უწყებების ოფიცრები. შესაბამის სხვა უწყებებთან კოორდინაციაში".

გოგაშვილის წერილამდე, TV პირველის ეთერში საქართველოს და რუსეთის უშიშროების სამსახურების წარმომადგენელთა საიდუმლო შეხვედრების შესახებ გოგაშვილის დაცვის ყოფილმა უფროსმა, ალექსანდრე სამხარაძემაც ისაუბრა.

• თქვა, რომ გოგაშვილთან ერთად იმყოფებოდა ვლადიკავკაზში სადაც ასევე იყვნენ გენერალური ინსპექციის უფროსი იოსებ ჭელიძე და კონტრტერორისტული ცენტრის დირექტორი ირაკლი ჩიმაკაძე.
• მისივე თქმითაც, მაშინ ვახტანგ გომელაურისა და ალექსანდ ბორნტიკოვის შეხვედრა მოამზადეს.

შეფასებები: პარტია ლელო აცხადებს, რომ საპარლამენტო ფრაქციებთან დაიწყებს კონსულტაციებს საქართველოსა და რუსეთის სპეციალური სამსახურების სავარაუდო კავშირების შესახებ საგამოძიებო კომისიის შესაქმნელად.

• სალომე სამადაშვილის განცხადებით, მიუხედავად იმისა, რომ საჯარო სივრცეში გავრცელებული ინფორმაცია სავარაუდო დანაშაულის შესახებ, გამოძიების დაწყების საფუძველია, შესაბამისი სახელმწიფო სტრუქტურების მიერ ამ საქმეზე გამოძიების დაწყება და მით უმეტეს, ობიექტურობის მოლოდინი ფუჭია.
• ქართული ოცნების წევრი და იურიდიულ საკითხთა კომიტეტის თავმჯდომარე, ანრი ოხანაშვილი კი ლელოს ინიციატივას "თითიდან გამოწოვილს" უწოდებს.
• თბილისის მერმა, კახა კალაძემ გოგაშვილის წერილს აბსურდი უწოდა და თქვა, რომ მტკიცებულებები რომ არსებობდეს გამოძიება დაიწყებოდა.
• მამუკა მდინარაძე კი ამბობს, რომ არ იცის ვინ სად დადიოდა და აღნიშნავს, რომ "რუსული მოგონილი ნარატივი" დამაზიანებელია არ მხოლოდ ქართული ოცნებისთვის, არამედ საქართველოსთვის.

On.ge ამ ისტორიის ფიგურანტებთან დაკავშირებას ცდილობს და მათ პასუხს მიღებისთანავე შემოგთავაზებთ.

• ამ ეტაპზე ჩვენ ზარებს არ პასუხობს არც ნინო გიორგობიანი და არც სახელმწიფო უსაფრთხოების სამსახური.