მარველის კინოსამყაროს კიდევ ერთი სუპერგმირი ქალი შეემატა. ფილმში Captain America: New World Order, რომელიც 2024 წელს გამოვა, მაყურებელი ახალ პერსონაჟს იხილავს — ისრაელელ სუპერგმირ საბრას. კინოსურათში გმირს ასევე ისრაელელი მსახიობი შირა ჰაასი განასახიერებს.

კომიქსებში საბრა 1980-იანი წლებიდან გამოჩნდა. მისი სახელი რუთ ბათ-სერაფია და იგი ყოფილი სუპერადამიანი აგენტია, რომელიც წინათ ისრაელის სადაზვერვო სააგენტო მოსადთან თანამშრომლობდა. საბრას განსაკუთრებული უნარები სუპერძალა და ენერგიაა, მისი კოსტიუმის მთავარი მახასიათებელი კი ისრაელის დროშის ფერები და დავითის ვარსკვლავია.

ფოტო: Marvel

რაც შეეხება შირა ჰაასს, 27 წლის მსახიობს მაყურებელი ყველაზე მეტად ნეტფლიქსის მინისერიალ Unorthodox-ით იცნობს. 2020 წელს გამოსული ეს სერიალი არაერთი კონკურსის ნომინანტი და პრიზიორიც გახდა.

Captain America: New World Order კი ერთ-ერთია მარველის სამყაროს იმ ფილმებიდან, რომელთა გამოსვლაც უახლოეს მომავალშია დაგეგმილი. ჰაასთან ერთად, მასში ენტონი მეკი და ტიმ ბლეიკ ნელსონიც მონაწილეობენ.

როგორც ცნობილია, ფილმის პრემიერა 2024 წლის 3 მაისს შედგება.