მთავარმა პროკურატურის განცხადებით, უწყებამ წერილობით მიმართა სახელმწიფო აუდიტის სამსახურს და მოითხოვა ხსენებულ უწყებაში მიმდინარე შემოწმების მასალების გადმოგზავნა.

კერძოდ, საქმე ეხება თბილისის მერიის მიერ, 2016 წლის პერიოდში, მუნიციპალიტეტის საკუთრებაში არსებული უძრავი ქონებების (მიწის ნაკვეთების) გადაცემის კანონიერებას.

"საქართველოს გენერალური აუდიტორის ლაშა თორდიას მიერ მედიასაშუალებებში გაკეთდა არაერთი განცხადება, რომელშიც იგი მიუთითებდა, რომ საქართველოს სახელმწიფო აუდიტის სამსახური სწავლობდა 2016 წელს, თბილისის მერიის მიერ მიწის ნაკვეთების გადაცემის საკითხის კანონიერებას და მასში იკვეთებოდა დანაშაულის ნიშნები.

მიუხედავად არაერთი განცხადებისა, სახელმწიფო აუდიტის სამსახურმა აღნიშნული მასალები არ გაასაჯაროვა და რეაგირების მიზნით სამართალდამცავ ორგანოს არ გაუგზავნა".

სახელმწიფო აუდიტის სამსახურის შესახებ საქართველოს კანონის 241-ე მუხლის თანახმად, დანაშაულის ნიშნების შემცველი აუდიტის მასალები დაუყოვნებლივ უნდა გაეგზავნოს სამართალდამცავ ორგანოს. პროკურატურის განცხადებით, აღნიშნულს სახელმწიფო აუდიტის სამსახური აჭიანურებს, და სწორედ ამიტომ, უწყებამ თავად გამოითხოვა მასალები შესაბამისი სამართლებრივი რეაგირებისთვის.