ცნობილმა კანადელმა მომღერალმა The Weeknd-მა ლოს-ანჯელესის სტადიონზე კონცერტის გამართვისას ღონისძიება შეაჩერა და დამსწრე აუდიტორიას მოუბოდიშა. გრემის ოთხგზის მფლობელმა მუსიკოსმა მსმენელს განუცხადა, რომ ხმა დაკარგა და კონცერტის გაგრძელებას ვეღარ შეძლებდა.

The Weeknd-მა, რომლის ნამდვილი სახელი აბელ ტესფეია, გამოსვლა კონცერტზე მესამე სიმღერის შესრულების დროს შეწყვიტა. იგი კულისებში გატრიალდა, რამდენიმე წუთში კი დაბრუნდა და სტადიონზე მყოფებს მიმართა.

"ამას ვერ ვუძლებ", — განაცხადა მომღერალმა, — "შოუს შეწყვეტა არ მინდა, მაგრამ ახლა ვერაფრით ჩავატარებ იმ კონცერტს, რომლის თქვენთვის ჩუქებაც მსურს. მინდა, დავრწმუნდე, რომ ყველა კარგადაა და თქვენ მიერ გადახდილ ფულს დაიბრუნებთ, მე კი თქვენთვის შოუს ძალიან მალე გავმართავ. მსურდა, გამოვსულიყავი და პირადად მომებოდიშებინა. ვწუხვარ, ძალიან მიყვარხართ".

აუდიტორიისთვის მობოდიშების შემდეგ, კანადელმა მუსიკოსმა განცხადება სოციალურ ქსელებში გაავრცელა და ახსნა, რომ ხმა კონცერტზე პირველი სიმღერის შესრულებისას წაერთვა. სხვათა შორის, ეს მომენტი ასახულია ტვიტერზე გავრცელებულ ვიდეოებშიც.

ფანების ნაწილმა კონცერტის დატოვებით უკმაყოფილება გამოთქვა, თუმცა, მეორე ნაწილმა მომღერალს მხარდაჭერა გამოუცხადა და აღნიშნა, რომ The Weeknd ტურნეს ივლისის დასაწყისის შემდეგ მართავს.

აღსანიშნავია, რომ The Weeknd ერთადერთი მუსიკოსი არაა, რომელსაც მსგავსი რამ შეემთხვა. რამდენიმე წლის წინ კონცერტის იმავე მიზეზით შეწყვეტა მოუწია ცნობილ ინგლისელ მუსიკოსს, ელტონ ჯონს. თუმცა, თუკი ჯონის შემთხვევაში ხმის წართმევა პნევმონიით იყო გამოწვეული, The Weeknd, როგორც ჩანს, ერთ-ერთია იმ მომღერლებიდან, რომელთაც მეტისმეტად გადატვირთული ტურნე აქვთ და ეს მათ ჯანმრთელობაზეც ახდენს გავლენას.

ტურნეს გამართვის ფიზიკურ და ემოციურ შედეგებზე ზოგიერთი მუსიკოსი ღიად საუბრობს. მათ შორის იყო ცნობილი შვედი შემსრულებელი Avicii, რომელმაც გარდაცვალებამდე ცოტა ხნით ადრე კონცერტების ჩატარება შეწყვიტა.