ტრასმა მადლობა გადაუხადა მხარდამჭერებს და აღნიშნა, რომ გაბედულ ზომებს მიიღებს.

რატომ არის მნიშვნელოვანი: მას შემდეგ, რაც ჯონსონმა პარტიის თავმჯდომარისა და პრემიერმინისტრის თანამდებობა დატოვა, მის შემცვლელად არაერთი კანდიდატურა განიხილებოდა.

  • საბოლოოდ, სია 2 ადამიანამდე შემცირდა — ტრასის კონკურენტი რიში სუნაკი იყო.
  • ხმის მიცემის შედეგად ტრასმა უმრავლესობა, დაახლოებით 57% აიღო და კონსერვატიული პარტიის ლიდერი გახდა.
  • ხვალ კი ის პრემიერმინისტრი გახდება, როცა დედოფალს ეწვევა და მთავრობას წარუდგენს.

ლიზ ტრასი საგარეო საქმეთა მინისტრის თანამდებობას იკავებდა. კანცლერისა და ჯანდაცვის მინისტრის წასვლის შემდეგ ის ბორის ჯონსონის მხარდამჭერად დარჩა, რამაც გააძლიერა მისი პოზიცია ერთგულთა შორის.

  • ტრასის რეპუტაცია განსაკუთრებით ამაღლდა უკრაინაში რუსეთის შეჭრის შემდეგ, როდესაც მან რუსეთისა და მისი ოლიგარქებისთვის სანქციების დაწესებას მხარი დაუჭირა.
  • როგორც BBC წერს, ის კონსერვატიული პარტიის წევრებს შორის პოპულარული ფიგურა გახდა ეკონომიკასა და ვაჭრობის შესახებ ლიბერტარიანული შეხედულებებით.

  • როცა ტრასმა პრემიერობისთვის ბრძოლა დააანონსა, აღნიშნა, რომ თანამდებობაზე მოსვლის პირველივე დღიდან გადასახადების შემცირებას დაიწყებს.

  • ასევე, განაცხადა, რომ დროა კონსერვატიულ ღირებულებებს დაუბრუნდნენ — "მე ვიბრძოლებ არჩევნებზე, როგორც კონსერვატორი და ვმართავ, როგორც კონსერვატორი".

რიში სუნაკი ხაზინის კანცლერის თანამდებობას იკავებდა და გარკვეული პერიოდის განმავლობაში კონსერვატიული პარტიის ახალ ლიდერად განიხილებოდა.

  • თუმცა, ბოლო რამდენიმე თვეში, ჯონსონის მსგავსად, ისიც არაერთ სკანდალში გაეხვა.
  • როგორც BBC წერს, სუნაკისა და მინისტრ საჯიდ ჯავიდის გადაწყვეტილებამ თანამდებობის დატოვებასთან დაკავშირებით, გზა გაუხსნა მაღალჩინოსნების გადადგომის ნაკადს, რომელმაც, საბოლოოდ, ჯონსონის გადადგომა გამოიწვია.

ბორის ჯონსონი: პრემიერმინისტრი 2019 წლის 24 ივლისს გახდა, თანამდებობა კი 2022 წლის 7 ივლისს დატოვა.

  • მანამდე, 2016 წლიდან 2018 წლამდე საგარეო საქმეთა მინისტრის თანამდებობას იკავებდა, ასევე, იყო ლონდონის მერი ორი ვადით — 2008 წლიდან 2016 წლამდე.
  • გასულ წელს ის არაერთ სკანდალში გაეხვა — დაარღვია კოვიდრეგულაციები, უპირებდნენ უნდობლობის გამოცხადებას, მის წასვლამდე კი არაერთმა მინისტრმა თანამდებობა დატოვა თანამდებობა. მიყოლებით დატოვა.
  • საბოლოოდ, ჯონსონმა გაიზიარა პარლამენტის სურვილი, პარტიის ახალი ლიდერისა და შესაბამისად, ახალი პრემიერმინისტრის არჩევის შესახებ.