პაპი ფრანცისკეს განცხადებას უკრაინის საგარეო საქმეთა მინისტრი, დმიტრო კულება გამოეხმაურა — ინფორმაციას უკრაინული მედია ავრცელებს.

რატომ არის მნიშვნელოვანი: პაპმა მწუხარება გამოხატა დუგინას დაღუპვის შესახებ და თქვა, რომ ომის საფასურს უდანაშაულოები იხდიან.

  • "ვფიქრობ იმ საწყალ გოგოზე, რომელიც მოსკოვში, მანქანაში მოწყობილი ბომბით ააფეთქეს. უდანაშაულოები იხდიან ომის საფასურს".
  • FSB ამტკიცებს, რომ დუგინას საქმე გახსნეს და მკვლელობას უკრაინის სპეცსამსახურებს აბრალებს — უკრაინამ ბრალდებები უარყო.

რას ამბობს კულება: უკრაინის საგარეო საქმეთა მინისტრმა პაპის სიტყვებს უსამართლო უწოდა და აღნიშნა, რომ ამან უკრაინელებს გული დასწყვიტა.

  • "ჩვენ ყურადღებით შევისწავლეთ პაპი ფრანცისკეს განცხადება და უპირველეს ყოვლისა, გადავწყვიტეთ საგარეო საქმეთა სამინისტროში წმინდა საყდრის ნუნციუსი გამოგვეძახებინა, რათა უკრაინის იმედგაცრუება გამოგვეხატა";
  • მისი თქმით, შეხვედრის შესახებ დეტალები უახლოეს მომავალში გახდება ცნობილი.

ვინ არის დარია დუგინა: ის პუტინის მთავარი იდეოლოგის, ალექსანდრ დუგინის შვილია და ბოლო წლებში მამის ერთ-ერთ უახლოეს თანამოაზრედ მიიჩნეოდა.

  • არაერთხელ გამოჩნდა რუსულ სამთავრობო მედიაში, სადაც პროსახელისუფლებო შეხედულებებს ავრცელებდა, აკრიტიკებდა დასავლეთს და უკრაინაში შეჭრას უჭერდა მხარს.