საყვარელი ფილმების ტრეილერებს ყველანი დიდი ენთუზიაზმით ველოდებით, რადგან სწორედ ტრეილერები გვაწვდის ინფორმაციას ფილმის სიუჟეტის, პერსონაჟებისა თუ სხვა მნიშვნელოვანი დეტალების შესახებ. მიუხედავად ამისა, ზოგჯერ ისეც ხდება, რომ ტრეილერებში დაპირებულს ფილმში ვერ აღმოვაჩენთ და ვხვდებით, რომ ტრეილერებით გაგვაცუცურაკეს.

მაშ ასე, წარმოგიდგენთ 7 შემთხვევას, როცა ტრეილერში ნანახი ფილმში ვერ ვნახეთ:

1. Thor: Love and Thunder

ფოტო: Marvel

როცა ქვილი თორს ურჩევს, თვალებში იმ ადამიანებს ჩახედოს, რომლებიც უყვარს, თორი ხუმრობით ქვილს უყურებს, რაზეც ქვილი ეუბნება: "მე არა". ამის შემდეგ კი თორი ყველაფერს უარყოფს და ეუბნება, რომ უბრალოდ უსმენდა. ქვილისა და თორის პატარა "დაპირისპირება" ფილმში არ მოხვდა და მხოლოდ თორის მრავლისმეტყველი მზერით დაკმაყოფილება მოგვიწია.

2. Jennifer's Body

ფოტო: 20th Century Fox

ტრეილერში ამანდა სეიფრიდის პერსონაჟი მეგან ფოქსის პერსონაჟს ეუბნება: "შენ ადამიანებს კლავ", რაზეც ეს უკანასკნელი პასუხობს: "არა, მე ბიჭებს ვკლავ". ფილმში ეს სცენა არაა.

3. Harry Potter and the Deathly Hallows: Part II

ფოტო: Warner Bros

ტრეილერში ვოლდემორის კითხვაზე, თუ რატომ ცოცხლობს, ჰარი პასუხობს: "იმიტომ, რომ ის მაქვს, რის გამოც სიცოცხლე ღირს". აღნიშნული სცენა ფილმში ვერ მოხვდა.

4. Fantastic Beasts and Where to Find Them

ფოტო: Warner Bros

ტრეილერში ნიუტი პოლიციელებს ამშვიდებს და ეუბნება, რომ სანერვიულო არაფერია, თუმცა ეს მომენტი ფილმში არ ჩანს.

5. Suicide Squad

ფოტო: Warner Bros. Pictures

Suicide Squad-ში ჯოკერის ბევრი სცენა ამოუჭრიათ. მაგალითად, ფილმში არ გვხვდება სცენა, როცა ჯარედ ლეტოს ჯოკერი ამბობს: "ერთი სული მაქვს, ჩემი სათამაშოები გაჩვენო".

6. Spider-Man: No Way Home

ფოტო: Sony

როცა პიტერი დოქტორ სტრეინჯს სთხოვს, ხალხს დაავიწყოს, რომ სპაიდერმენია, მათ საუბარში ვონგი ერთვება და სტრეინჯს აფრთხილებს: "სტრეინჯ! ეგ შელოცვა არ გამოიყენო, ზედმეტად საშიშია!" ფილმში ვონგი ასეთი მომთხოვნი არაა და სტრეინჯს უბრალოდ ეუბნება, რომ მას თავი დაანებონ.

7. Iron Man 2

ფოტო: Marvel

ტრეილერში ვხედავთ, რომ ნატაშა რკინის კაცის იარაღით ისვრის, თუმცა ეს სცენა ფილმში არაა.