გარემოსდაცვითი ზედამხედველობის დეპარტამენტის განცხადებით, ინსპექტორებმა რამდენიმე რეპტილიით ვაჭრობის ფაქტი გამოავლინეს.

კერძოდ, უწყების ცნობით, მოქალაქეებს, გარეული ცხოველების, მათ შორის, საქართველოს წითელი ნუსხით დაცული სახეობის გაყიდვის შესახებ განცხადებები, ინტერნეტმაღაზია - mymarket.ge-ზე ჰქონდათ განთავსებული.

დეპარტამენტის ცნობით, აღნიშნული მოქალაქეებიდან, ორი არასრულწლოვანი აღმოჩნდა, რომლებსაც ახსნა-განმარტება ჩამოართვეს და სიტყვიერი გაფრთხილება მისცეს. დეპარტამენტის ინსპექტორებმა დატყვევებული ცხოველები (რეპტილიები) საარსებო გარემოში დააბრუნეს.

ზედამხედველობის სამსახურის განცხადებით, ადმინისტრაციული სამართალდარღვევის შესახებ, ოქმი ერთი მოქალაქის მიმართ შედგა, რომელიც mymarket.ge-ზე საქართველოს წითელი ნუსხით დაცულ სახეობას - ხმელთაშუაზღვეთის კუს ჰყიდდა.

ადმინისტრაციული სამართალდარღვევის შესახებ ოქმი, რაც წითელი ნუსხით დაცული სახეობებით ვაჭრობაზე სანქციას გულისხმობს, ითვალისწინებს საჯარიმო თანხას 150-დან 850 ლარამდე.