აშშ-ს წარმომადგენელთა პალატის სპიკერმა, ნენსი პელოსიმ ტაივანი უკვე დატოვა.

რატომ არის მნიშვნელოვანი: ტაივანში პელოსის ვიზიტს ჩინეთი ეწინააღმდეგებოდა

  • ნენსი პელოსი არის პირველი სპიკერი, რომელიც ბოლო 25 წლის განმავლობაში ტაივანში ჩავიდა.
  • ტაივანი თვითმმართველი დემოკრატიაა, რომელსაც ჩინეთი საკუთარ ტერიტორიად მიიჩნევს და აშშ-ის ოფიციალური პირების ვიზიტს განიხილავს, როგორც კუნძულის დამოუკიდებლობის მომხრე ბანაკისთვის წამახალისებელი სიგნალის გაგზავნას.

დეტალები: კონგრესის ოფიციალური დელეგაციის ვიზიტი აზიის ქვეყნებში 29 ივლისს დაიწყო – ოფიციალურ მარშრუტში შედის იაპონია, სამხრეთ კორეა, მალაიზია და სინგაპური.

  • ტაივანში ჩასვლის შემდეგ სპიკერმა დატვიტა, რომ ვიზიტის მიზანი აშშ-ის მხარდაჭერის გამოხატულებაა.

  • პარალელურად კი, ჩინეთმა ცეცხლსასროლი იარაღის წვრთნები დაიწყო.

ვიზიტისას პელოსი შეხვდა ტაივანის პრეზიდენტს, საკანონმდებლო ორგანოს ვიცე-პრეზიდენტს და ვიდეოზარით ესაუბრა თავმჯდომარეს.

  • პელოსის თქმით, კიდევ ერთხელ დაადასტურეს მტკიცე მხარდაჭერა ტაივანის დემოკრატიისადმი, მათ შორის უსაფრთხოებისა და სტაბილურობის საკითხებში და თავმჯდომარეს სწრაფი გამოჯანმრთელება უსურვეს.

რა ხდებოდა მანამდე: ჩინეთმა გააფრთხილა ბაიდენის ადმინისტრაცია, რომ თუ დაგეგმილი ვიზიტი შესრულდებოდა, სახალხო განმათავისუფლებელი არმია ზომებს მიიღებდა.

  • აშშ-ის პრეზიდენტმა ჯერ კიდევ ივლისში განაცხადა, რომ პენტაგონი არ უჭერს მხარს პელოსის იდეას და თავდაცვის უწყება ტაივანში აშშ-ის ოფიციალური პირების ჩასვლის წინააღმდეგია.
  • სახელმწიფო მდივანმა კი აღნიშნა, რომ შედგება თუ არა ვიზიტი, სპიკერის გადასაწყვეტია.
  • კრემლის სპიკერმა, დიმიტრი პესკოვმა დაგეგმილი ვიზიტი პროვოკაციად შეაფასა.

რატომ წავიდოდა პელოსი: ეს კითხვა ბევრს გაუჩნდა იმის ფონზე, რომ ვიზიტი დაძაბულობას იწვევს.

  • როგორც CNN წერს, ვიზიტის მომხრეებს შორის უჩვეულოდ ბევრი რესპუბლიკელია და ისინი ამბობენ, რომ სპიკერისთვის მნიშვნელოვანია ტაივანისადმი მხარდაჭერა გამოხატოს და ხაზი გაუსვას, რომ ვაშინგტონი სერიოზულად არის განწყობილი იურიდიული ვალდებულების მიმართ.
  • პელოსი ასევე პეკინის პოლიტიკის აქტიური კრიტიკოსი და დემოკრატიის სიმბოლოა — ცხოვრების წესის, რომელიც შენარჩუნებასაც სასოწარკვეთილად ცდილობენ ჩინეთის ავტორიტარული რეჟიმის ქვეშ.
  • ამ საკითხზე მეტი ინფორმაციის მიღება პელოსის ოპ-ედიდან შეგიძლიათ.