რადგან სახლის მოვლა და დასუფთავება დიდწილად რუტინული სამუშაოა, ხშირად ამ საქმეს ინსტინქტურად და დიდი ფიქრის გარეშე ვასრულებთ. ამიტომ, მოსალოდნელია, რომ პროცესში ბევრ შეცდომას ვუშვებდეთ — მეტიც, როცა გვგონია, რომ სახლს ვასუფთავებთ, შესაძლოა, შედეგი სულ სხვაგვარი აღმოჩნდეს ამ შეცდომების გამო. ასე რომ, მნიშვნელოვანია არა ის, თუ რამდენად გულმოდგინედ და დიდხანს ასუფთავებთ სახლს, არამედ — რამდენად ეფექტურად ასრულებთ ამ საქმეს.

ამ სტატიაში წარმოგიდგენთ იმ გავრცელებულ შეცდომებს, რომლებსაც ბევრი ჩვენგანი უნებურად უშვებს.

1. დაუსუფთავებელი ხელსაწყოების გამოყენება

მნიშვნელოვანია, სახლის დალაგების დაწყებამდე დავრწმუნდეთ, რომ ჩვენი ხელსაწყოები სუფთაა. ეს ეხება არა მხოლოდ ტექნიკას, მაგალითად, მტვერსასრუტს — არამედ ჯაგრისებს, ქსოვილის ნაჭრებს, შვაბრას და სხვა. მათი გულდასმით დასუფთავება ყოველი გამოყენების შემდეგ აუცილებელია, რადგან, ცხადია, ადვილად შეიძლება დაბინძურების წყაროდ იქცნენ.

2. ზედაპირების ღრუბლით დასუფთავება

სამზარეულოს დასასუფთავებლად არაერთი ადამიანი იყენებს ღრუბელს, რადგან სითხეს კარგად იწოვს და, ერთი შეხედვით, ზედმოჭრილია ზედაპირების დასასუფთავებლად. თუმცა, არ უნდა დაგავიწყდეთ, რომ სითხესთან ერთად ღრუბლები ადვილად ისრუტავენ ბაქტერიებს, შემდეგ კი ასევე მარტივად ავრცელებენ მათ სხვაგან. ამის გათვალისწინებით, რეკომენდებულია, ზედაპირების გადასაწმენდად მიკრობოჭკოვანი ნაჭერი გამოიყენოთ, ღრუბლებს კი მუდმივად გაუკეთოთ დეზინფექცია და ხშირად, საშუალოდ, თვეში ერთხელ მაინც გამოცვალოთ.

3. ერთი და იმავე ნაჭრის გამოყენება მთელ სახლში

მართალია, ქსოვილის ნაჭერი ღრუბელივით ვერ ისრუტავს სითხეს და ბაქტერიებს, ის არანაკლებ დამაბინძურებლად შეიძლება იქცეს. ამიტომ, მიუღებელია, სახლის ერთ ნაწილში დასასუფთავებლად გამოყენებული ნაჭერი სხვაგანაც გამოიყენოთ. აუცილებელია, კონკრეტული კუთხეების, განსაკუთრებით კი სველი წერტილებისა და სამზარეულოს დასალაგებლად ცალკე ნაჭრები იყოს გამოყოფილი, რომლებიც მუდმივად გაირეცხება. ქაღალდის ხელსახოცების გამოყენება კი, რა თქმა უნდა, მხოლოდ ერთჯერადადაა რეკომენდებული.

4. დასუფთავების იატაკიდან დაწყება

დალაგებას ხშირად იატაკით იწყებენ, რაც შეცდომაა. ზედაპირების და ავეჯის დასუფთავების შემდეგ მტვერი ძირს იყრება, ამიტომ საქმეს იორმაგებთ. შესაბამისად, უმჯობესია, დასუფთავება ზემოდან ქვემოთ დაიწყოთ — ჭერით, თაროებით და ფარდის საკიდებით, შემდეგ კი ნელ-ნელა გადაინაცვლოთ იატაკისკენ, რომელსაც ბოლოს დაალაგებთ.

5. არასაკმარისი განიავება

როგორც მტვრის გადაწმენდისას, ასევე დასასუფთავებელი საშუალებების გამოყენებისას, განსაკუთრებით მნიშვნელოვანია, ოთახი კარგად ნიავდებოდეს. ამიტომ, დალაგების დაწყებისთანავე აჯობებს, სავენტილაციო სისტემა ჩართოთ, ან ფანჯარა გააღოთ, საქმის დასრულების შემდეგ კი ოთახი დატოვოთ და კარგად განიავების საშუალება მისცეთ.

ბონუსი: არასწორი საწმენდი საშუალებები

როგორც ვთქვით, განიავება მნიშვნელოვანია იმიტომაც, რომ დასასუფთავებელ ქიმიურ საშუალებებს ვიყენებთ. ამიტომ, ყურადღება მიაქციეთ, რომელ და როგორ საწმენდ პროდუქტს ყიდულობთ. უმჯობესია, ისინი იყოს ანტიალერგიული, ჰქონდეს უსაფრთხო ქიმიური შემადგენლობა, არ ახდენდეს უარყოფით გავლენას ეკოლოგიაზე და სხვა.

სტატიას წარმოგიდგენთ ეკოლოგიურად სუფთა სარეცხი და საწმენდი საშუალებები გერმანიიდან: fit-gmbh არის სარეცხი და საწმენდი საშუალებების მწარმოებელი კომპანია 55-წლიანი გამოცდილებით. პროდუქცია 100%-ით წარმოებულია გერმანიაში.
fit-gmbh-ის ეკო ხაზის პროდუქცია Grüne Kraft არის ყველასათვის ხელმისაწვდომი ეკოლოგიურად სუფთა საწმენდი და სარეცხი საშუალებები. Grüne Kraft-ის ხაზის პროდუქცია ფლობს საერთაშორისო ხარისხის და ეკოსერტიფიკატს - EU Ecolabel.