თუ ხართ დამწყები მუსიკოსი და გაქვთ სურვილი ამიერკავკასიის ყველაზე მასშტაბურ მუსიკალურ ფესტივალზე უკვე შემდგარ და წარმატებულ შემსრულებლებთან ერთად გამოხვიდეთ, გეტყვით, რომ ალტერვიჟენ ჯგუფი და ილიას სახელმწიფო უნივერსიტეტი წარმოგიდგენთ ყოველწლიურ მუსიკალურ პროექტს Tbilisi Newcomers 2017.

15 -დან 27 მაისის ჩათვლით პროექტით დაინტერესებულმა მუსიკოსებმა რეგისტრაცია უნდა გაიაროთ პროექტის ოფიციალურ ვებგვერდზე www.newcomers.ge, ატვირთოთ ფოტოსურათი, სამი mp3 და ბიოგრაფია.

მიღებული აპლიკაციები განიხილება და მათგან საუკეთესოს შოუქეისზე, 5 და 6 ივნისს ილიაუნის თეატრში შევხვდებით, ფინალური კონცერტი კი, 10 ივნისს, ლისის ტბაზე, ილიაუნის მე-11-ე დაბადების დღეზე შედგება.

პროექტი ოთხი ეტაპისგან შედგება:

  • შესარჩევი ეტაპი.
  • Showcase, რომელზეც შერჩეული ბენდები ცოცხლად ასრულებენ თავიანთ კომპოზიციებსა და ცნობილი სიმღერების cover-ებს.
  • ფინალური კონცერტი, რომელიც ილიაუნის მე-11 დაბადების დღის საინტერესო და მრავალფეროვანი პროგრამის ნაწილი იქნება.
  • ილიაუნის დაბადების დღეზე, ფინალურ შოუ კონცერტზე გამოვლინდებიან ის საუკეთესო შემსრულებლები, რომლებიც მონაწილეობას მიიღებენ ფესტივალში Tbilisi Open Air 2017, რომელიც 16, 17, 18 ივნისს ჩატარდება ლისი ვანდერლენდის ტერიტორიაზე.

პროექტი Tbilisi Newcomers, რომელიც 2009 წლიდან ტარდება, ახალი ბენდებისა და მუსიკალური პროექტების აღმოჩენას ემსახურება. ცხრა წლის განმავლობაში პროექტში მონაწილეობის სურვილი ათასამდე ქართულმა ბენდმა და მუსიკოსმა გამოთქვა.