თბილისის მერიამ ორ მილიონ ლარად ახალი მედიათეკა ააშენა

ვაკისა და ვარკეთილის შემდეგ, ახალი მედიათეკა ნაძალადევში, თბილისის ვეტერანთა დასვენებისა და კულტურის პარკში გაიხსნა. ეს თბილისში არსებული მედიათეკების რიგით მესამე ფილიალია. თბილისის მერია აცხადებს, რომ ის თანამედროვე სტანდარტებითაა აშენებული და აღჭურვილი.

მედიათეკა მთელ ქალაქს მოემსახურება. მერიის ინფორმაციით, სამივე ფილიალში, ამ დროისათვის, 20 000-მდე წიგნი ინახება და ეს ფონდი მომავალშიც განახლდება.

"ახალი მედიათეკა, რიგით მესამეა და დანარჩენი ორისგან განსხვავებით უფრო მასშტაბურია"- განაცხადა მედიათეკის გახსნაზე მისულმა თბილისის მერმა, დავით ნარმანიამ.

თბილისის მედიათეკების გაერთიანება მულტიმედიური ბიბლიოთეკების ქსელია, რომელიც 2013 წელს გაიხსნა და კულტურულ-საგანმანათლებლო პლატფორმას წარმოადგენს. მედიათეკაში მისულ სტუმრებს აქვთ წვდომა ელექტრონულ რესურსებთან, იყენებენ სამუშაო სივრცეებს.

მედიათეკა ღიაა ბავშვებისა და მოზარდებისთვისაც, რომელთათვისაც საგანმანათლებლო-შემეცნებითი პროგრამები ტარდება.

როგორც მედიათეკის პრესსამსახურში On.ge-ს უთხრეს, მისი წევრობა ფასიანია. 6-თვიანი აბონემენტის ღირებულება 15 ლარს შეადგენს და მის მფლობელს სამივე ფილიალში შეუძლია სტუმრობა ყველა დღეს, ორშაბათის გარდა. მედიათეკა დილის 10 საათიდან იხსნება. ვაკის ფილიალი საღამოს 9 საათამდეა ღია, ხოლო ვარკეთილში და ნაძალადევში მდებარე მედიათეკები საღამოს 7 საათამდე.

მედიათეკების შენობები დაკომპლექტებულია სამკითხველო დარბაზებით, კომპიუტერული სივრცეებითა და მულტიმედიური ოთახებით, სადაც ეწყობა ფილმების ჩვენებები, კონფერენციები და სხვადასხვა ხასიათის შეხვედრები.

ახალი მედიათეკის მშენებლობისთვის დედაქალაქის ბიუჯეტიდან 2 087 000 ლარი დაიხარჯა.