ქართულ ბაზარზე ახალი გამაგრილებელი სასმელი გამოჩნდა. "ნატახტარი ზიგზაგი" — ასე ჰქვია ახალ სასმელს, რომელიც კომპანია ეფეს საქართველომ სამომხმარებლო კვლევებითა და პროდუქტის სხვადასხვა გემოს ტესტირებაზე დაყრდნობით შექმნა. "ზიგზაგის" პროდუქტის მთავარი ნიშანი "გემოების თამაშია". მისი განსაკუთრებულობა განპირობებულია სხვადასხვა არომატისა და იშვიათი ინგრედიენტების მიქსით. ბაზარზე ერთდროულად "ზიგზაგის" არომატების ორი განსხვავებული მიქსია წარმოდგენილი: ფორთოხალი მანდარინით და ჯანჯაფილი დარიჩინითა და ლიმონით. "ნატახტარი ზიგზაგი" საქართველოს მაღაზიებში უკვე ხელმისაწვდომია.

ბრენდის კონცეფცია ხაზს უსვამს პიროვნების უნიკალურობას: "ზიგზაგი" არის მათთვის, ვინც ცდილობს, იყოს გამორჩეული სხვებისგან და შეიგრძნოს ცხოვრება სრულად, ეძებს თავგადასავლებს, არ მიჰყვება დადგენილ წესებსა და სტანდარტებს, სურს, ყველაფერი თავისით შეისწავლოს და თავისებურად გააკეთოს. აქედან გამომდინარეობს კამპანიის გზავნილიც: "შენ არავინ გგავს".

ბრენდის სახელიც — "ზიგზაგი" — აქედან მოდის. სასმელი ასეთი სახელით გვეუბნება, რომ გემო არ მიჰყვება ერთ ხაზს, ის მოულოდნელობებით სავსეა, სათავგადასავლოც კი. კონცეფციიდან გამომდინარე, "ზიგზაგი" არის მეამბოხე, ნონკონფორმისტი, უყვარს ძიება, არ აშინებს დაბრკოლებები. მასთან ურთიერთობა სასიამოვნოა, არ გზღუდავს და უფრო თავისუფალს გხდის.

"ჩვენი ბიზნესის ყველაზე მნიშვნელოვანი რგოლი ჩვენი მომხმარებელია. ჩვენ მუდმივად ვიკვლევთ მათ სურვილებსა და მოთხოვნილებებს, ვსწავლობთ ქცევასა და დამოკიდებულებებს. სწორედ ასეთი კვლევების შედეგად გამოიკვეთა ახალი გამაგრილებელი სასმლის შექმნის იდეა. ეტაპობრივი სამომხმარებლო კვლევებითა და პროდუქტის სხვადასხვა გემოების ტესტირებით შევქმენით სრულიად ახალი ბრენდი, რომელიც განსაკუთრებულად მიმზიდველია ახალგაზრდებისთვის", — გვეუბნება ეფეს საქართველოს უალკოჰოლო სასმელების მარკეტინგის მენეჯერი, გურანდა ნემსაძე.

კამპანიის ფარგლებში, კომპანია ეფეს საქართველოსა და სააგენტო FCB Artgroup Tbilisi-თან თანამშრომლობით, ასევე შეიქმნა ვიდეორგოლიც.