Stranger Things-ის ფანები სერიალის ყოველი სეზონისთვის ახალ-ახალ თეორიებს იმარაგებენ. ერთ-ერთი ყველაზე პოპულარული თეორია კი უილის სექსუალურ ორიენტაციას ეხებოდა. ყოველი სეზონის გამოსვლის შემდეგ ფანები უფრო მეტად ეჭვობდნენ, რომ უილი გეი იყო. ცოტა ხნის წინ ეჭვებს წერტილი თავად უილის როლის შემსრულებელმა ნოა შნაპმა დაუსვა. მან საბოლოოდ დაადასტურა, რომ უილი გეია და მისი საუკეთესო მეგობარი, მაიკი უყვარს.

"ამ სეზონში აშკარაა, რომ უილს მაიკის მიმართ გრძნობები აქვს. ამას გასულ სეზონებში გამიზნულად გვანიშნებდნენ. პირველ სეზონშიც კი მიგვანიშნეს და ეს ხაზი თანდათანობით გაიზარდა. ვფიქრობ, მეოთხე სეზონში იმ პერსონაჟს ვთამაშობ, რომელსაც თავისი საუკეთესო მეგობარი უყვარს, მაგრამ არ იცის, მიიღებენ თუ არა მის გრძნობებს. თავს შეცდომად თვლის და ჰგონია, რომ მისი ადგილი არსად არაა. უილი თავს ყოველთვის ასე გრძნობდა. მის ყველა მეგობარს შეყვარებული ჰყავდა და ყველას ჰქონდა საკუთარი ადგილი, მაგრამ უილმა თავისი ადგილი ვერსად იპოვა. ვფიქრობ, სწორედ ამიტომ უამრავი ადამიანი მოდის და მეუბნება, რომ უილი უყვარს და საკუთარ თავს ამსგავსებს, რადგან ის ნამდვილი პერსონაჟია", — ამბობს ნოა.

მეოთხე სეზონში უილის მაიკის მიმართ გრძნობები კიდევ ერთხელ არგაილის ფურგონით მგზავრობისას დადასტურდა, როცა უილი მაიკისგან შეუმჩნევლად ატირდა.

"მიყვარს უილის განსახიერება. ეს სცენა მისთვის ძალიან მნიშვნელოვანი იყო, რადგან გაამყარა სიმართლე, რომ მას თავისი საუკეთესო მეგობარი უყვარს და არ იცის, როგორ უთხრას", — ამბობს ნოა.

აღსანიშნავია, რომ ეს პირველი შემთხვევაა, როცა მსახიობმა უილის სექსუალური ორიენტაციის შესახებ ეჭვები დაადასტურა. აქამდე ნოა ამ დეტალს ყოველთვის მაყურებლის ინტერპრეტაციას ანდობდა.

ამავე თემაზე: