NDI-ის კვლევით, კითხვაზე უნდა შევინარჩუნოთ თუ არა პარლამენტში მაჟორიტარი კანდიდატები, გამოკითხულთა თითქმის ნახევარი, 47 პროცენტი დადებითად პასუხობს, ხოლო, 28 პროცენტს უარყოფითი პოზიცია აქვს, გამოკითხულთა 24 პროცენტი კი პასუხობს "არ ვიცი".

კვლევისას გამოკითხულთა 31 პროცენტი ფიქრობს, რომ მოსახლეობის საჭიროებები ყველაზე კარგად მაჟორიტარული წესით არჩეულ დეპუტატს ესმის. ამასთან 29 პროცენტის აზრით, მოსახლეობის საჭიროებები არც პარტიული სიით და არც მაჟორიტარული წესით არჩეულ დეპუტატს არ ესმის.

ამჟამად საქართველოს პარლამენტში 150 დეპუტატია. აქედან 77 აირჩევა მოქალაქეების მიერ პოლიტიკური პარტიებისთვის ხმის მიცემით, დანარჩენი 73 კი - ინდივიდუალური მაჟორიტარი კანდიდატისთვის ხმის მიცემით.

კვლევის საველე სამუშაოები NDI-ის დაკვეთით, CRRC-იმ 2017 წლის 7-28 აპრილის პერიოდში ჩაატარა. გამოკითხული 2 493 მოქალაქე წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოკითხეს. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.