თბილისის მუნიციპალურმა ინსპექციამ სამგორის რაიონში ნაგებობების დემონტაჟი გამთენიისას დაიწყო.

რატომ არის მნიშვნელოვანი: ეს პირველი შემთხვევა არ არის, როდესაც მერია აფრიკის დასახლებაში მშენებარე სახლების დემონტაჟს ახდენს.

რას ამბობს მერია: მუნიციპალური ინსპექცია აცხადებს, რომ სახელმწიფოს საკუთრებაში არსებულ მიწის ნაკვეთებზე, სამშენებლო სამართალდარღვევის რამდენიმე ფაქტი გამოავლინეს.

  • "თბილისის მუნიციპალურმა ინსპექციამ სამართალდამრღვევები რამდენიმე დღის
    წინ გააფრთხილა, რათა მათ უკანონო მშენებლობა შეეჩერებინათ და დემონტაჟი
    დაეწყოთ, თუმცა, მოქალაქეებს სამშენებლო პროცესი არ შეუწყვეტიათ".

რას ამბობენ მოქალაქეები: ერთ-ერთი მოქალაქის თქმით, მერიის თანამშრომლები მიდიოდნენ დასახლებაში, ფოტოებს უღებდნენ ტერიტორიას და მოსახლეობას არაფერს ეუბნებოდნენ.

  • "ვაპირებ, გავაგრძელო მშენებლობა. რამდენჯერაც დაანგრევენ, იმდენჯერ ავაშენებ", — ამბობს ერთ-ერთი მშენებარე სახლის მეპატრონე ფორმულასთან.
  • აფრიკის დასახლების მაცხოვრებლების თქმით, წასასვლელი არსად აქვთ და ამ სახლების ასაშენებლად სესხები აიღეს.