ამერიკელი მწერლის, კოლინ ჰუვერის, მსოფლიო ბესტსელერად ქცეული რომანი It Ends with Us ქართულად ითარგმნა. წიგნს მალე გამომცემლობა პალიტრა L გამოსცემს, მისი მთარგმნელი კი ნათია ჩუბინიძეა.

2016 წელს გამოცემული სასიყვარულო რომანი ოცზე მეტ ენაზეა თარგმნილი და მილიონზე მეტ ეგზემპლარადაა მსოფლიოში გაყიდული. წიგნი განსაკუთრებით პოპულარული გასულ წელს გახდა, როცა ტიკტოკის პლატფორმაზე წიგნის მოყვარულების ყურადღება მიიქცია. ნაწარმოების სათაურის ჰეშტეგით შექმნილ ვიდეოებს ტიკტოკზე ამჟამად ჯამში 946 მილიონზე მეტი ნახვა აქვთ.

აღსანიშნავია, რომ თავად ავტორის თქმით, თავისი წიგნებიდან It Ends with Us ყველაზე რთულად დასაწერი ნაწარმოები იყო, რადგან სიუჟეტი მისი მშობლების ურთიერთობას ეფუძნება.

ნაწარმოებში მოქმედება ახალგაზრდა ლილი ბლუმის გარშემო ვითარდება, რომელიც საცხოვრებლად ბოსტონში გადადის და საკუთარ მცირე ბიზნესს იწყებს. ლილის გრძნობები უჩნდება ნეიროქირურგ რაილ კინქეიდის მიმართ, რომელიც თავდაპირველად სერიოზულ ურთიერთობას გაურბის. ამ ურთიერთობაში კი წინააღმდეგობას არა მხოლოდ რაილის დამოკიდებულებები, არამედ ლილის წარსული გამოცდილებებიც ქმნიან.

ფოტო: Sakuranko.com

It Ends with Us-მა 2016 წელს მკითხველების ყველაზე დიდი პლატფორმის, Goodreads-ის ჯილდო დაიმსახურა წლის საუკეთესო სასიყვარულო რომანის კატეგორიაში. ფინალურ ტურში ნაწარმოებს მხარი 60 ათასამდე მკითხველმა დაუჭირა.

აღსანიშნავია, რომ ტიკტოკზე გაპოპულარების შემდეგ, ჰუვერის რომანი The New York Times-ის ბესტსელერების სიის სათავეშიც აღმოჩნდა. საინტერესოა ისიც, რომ თავად მწერალი ამავე სიის საუკეთესო ხუთეულში სამი წიგნითაა წარმოდგენილი.

სხვათა შორის, It Ends with Us-ის ისტორია მალე მეორე წიგნით გაგრძელდება. რომანი It Starts with Us წლევანდელი წლის ოქტომბერში გამოიცემა.

მიმდინარეობს მუშაობა ნაწარმოების ეკრანიზაციაზეც. ამ დროისთვის ფილმის სცენარის თავდაპირველი ვარიანტი უკვე დასრულებულია.