დღეს, 13 მაისს საქართველოს ღვინის კლუბი უკვე მერვედ ხსნის ახალი ღვინის ფესტივალს, რომლის მთავარი მიზანიც ქართული ღვინის პოპულარიზაცია, საქართველოში ღვინის განათლების დონის ამაღლება და სამომხმარებლო კულტურის გაზრდაა.

ახალი ღვინის ფესტივალი ტრადიციული ფორმატით ჩატარდება, მთაწმინდის პარკში. 11:00-დან 18:00 საათამდე, სადაც ოჯახური, საშუალო და დიდი მეღვინეობები საქართველოს სხვადასხვა რეგიონიდან ფესტივალის სტუმრებს წარუდგენენ 2016 წლის მოსავლის ღვინოებს.

აღსანიშნავია, რომ 2016 წელს ახალი ღვინის ფესტივალმა 40 000-ზე მეტ სტუმარს უმასპინძლა, რომელთა შორის მრავლად იყვნენ უცხოელი ტურისტები და ქართული ღვინის შესახებ მასალა სამოცამდე მედიასაშუალებამ მოამზადა, დაიწერა ბლოგპოსტები, სტატიები, მომზადდა ტელე და რადიოგადაცემები, პროფესიული თუ სამოყვარულო ვიდეოები.

ფესტივალზე უკვე მეორედ წარდგა "ბინა 37", რომელსაც სრულიად უცხო გარემოში, საცხოვრებელი სახლის მერვე სართულზე აქვთ გახსნილი რესტორანი და მარანი.

"ბინა 37"

"ბინა 37"

"ეს ჩვენი მეორე ფესტივალია, გამოტანილი გვაქვს ქისი, რქაწითელი, კახური მწვანე და ა.შ. მარანის დაარსება 2 წლის წინ გადავწყვიტეთ. ვეძისში, საცხოვრებელი კორპუსის მე-8 სართულის ვერანდაზე მარანთან ერთად სადეგუსტაციო სივრცეც გვაქვს, სადაც ჩვენს სტუმრებს შეუძლიათ ჩვენი ღვინისა და ქართული კერძების დაგემოვნება.", - უთხრა On.ge-ს ზურა ნატროშვილმა, "ბინა 37"-ის დამფუძნებელმა.

"ბინა 37"

"ბინა 37"

ფოტო: Bina N37/ ბინა N37

ახალი ღვინის ფესტივალზე დასწრება თავისუფალია, შესაბამისად ნებისმიერ თქვენგანს შეუძლია ეწვიოს მთაწმინდის პარკს და დააგემოვნოს ქართული ღვინის 2016 წლის მოსავალი.