პარლამენტის თავჯდომარე ირაკლი კობახიძის განცხადებით, მიწის გასხვისებასთან დაკავშირებით კონსტიტუციაში ცვლილება შედის და მიწა განისაზღვრება, როგორც განსაკუთრებული მნიშვნელობის რესურსი:

"გარდა ამისა, აღინიშნება, რომ ორგანული კანონით წესრიგდება მიწის საკუთრებასთან დაკავშირებული ურთიერთობები, რაც ჩვენ მოგვცემს იმის საშუალებას, რომ ერთი მხრივ, არ შევზღუდოთ ის პოზიტიური ინვესტიციები, რომელიც შემოდის საქართველოში, მათ შორის, აგრარულ სფეროში. ჩვენ გვაქვს ჩვენი სტრატეგიული ეროვნული ინტერესები და ეს ინტერესები აუცილებლად იქნება დაცული".

მიწების უცხოელებზე გასხვისებას მიუღებლად მიიჩნევს საპარლამენტო ფრაქცია ქართული ოცნება - სოციალ-დემოკრატების მდივანი ბექა ნაცვლიშვილი. ის აპრილის დასაწყისში აცხადებდა, რომ საკონსტიტუციო ცვლილებების პროექტის მიხედვით, უცხო ქვეყნის მოქალაქეებისთვის მიწის გასხვისებისას შეზღუდვები დაწესდებოდა.

ბექა ნაცვლიშვილი ამბობდა, რომ მის პოზიციას იზიარებდა საკონსტიტუციო კომისიის წარმომადგენლების უმრავლესობა.

ქართული ოცნების წევრი კობა ნარჩემაშვილი და საკონსტიტუციო სასამართლოს მოსამართლე მანანა კობახიძე ჯერ კიდევ იანვარში აფიქსირებდნენ თავიანთ პოზიციას და აცხადებდნენ, რომ მიწის უცხოელებზე გასხვისება მათთვის მიუღებელი იყო.