ფინანსთა სამინისტროს საგამოძიებო სამსახურმა უფლებამოსილების ბოროტად გამოყენების და კომერციული მოსყიდვის ბრალდებით სამეგრელოში ერთი მედდა დააკავა.

რატომ არის მნიშვნელოვანი: საგამოძიებო სამსახურის განცხადებით, დანაშაულში უკვე ამხილეს თხუთმეტი მოქალაქე, რომლებიც 300 ლარამდე თანხის სანაცვლოდ, ვაქცინირებულად დარეგისტრირდნენ.

  • უწყებაში ამბობენ, რომ დანაშაულებრივი გზით იმუნიზაციის მართვის ელექტრონულ მოდულში დარეგისტრირებულია დამატებით ათეულობით პირი, რომელთა დადგენა-მხილების მიზნითაც მიმდინარეობს შესაბამისი ღონისძიებები.

დეტალები: საქმეზე გამოძიება საქართველოს სისხლის სამართლის კოდექსის 220-ე და 221-ე მუხლებით გრძელდება, რაც სასჯელის სახით თავისუფლების აღკვეთას 3-დან 5 წლამდე ვადით ითვალისწინებს.

მნიშვნელოვანია იცოდე, რომ ვაქცინაცია სწორი არჩევანია Covid-19-სგან საკუთარი თავის, ოჯახისა და საზოგადოების დასაცავად.

  • ვაქცინაცია ამცირებს დაინფიცირების, ავადობისა და სიკვდილობის რისკს და პანდემიის შეჩერების ერთ-ერთი ყველაზე ეფექტური საშუალებაა.
  • ვაქცინაცია რეკომენდებულია იმ შემთხვევაშიც, თუ Covid-19 უკვე გადაიტანეთ, რადგან, არსებული მტკიცებულებებით, ინფექციის გადატანის შემდგომ არ ყალიბდება ხანგრძლივი იმუნიტეტი და ადამიანი კვლავ რჩება განმეორებითი ინფიცირების რისკის ქვეშ.