ივანე ჯავახიშვილის სახელობის თბილისის სახელმწიფო უნივერსიტეტის განცხადებით, ადმინისტრაცია არ დაუშვებს საუნივერსიტეტო სივრცეში პოლიტიკური დაპირისპირების მცდელობას.

რატომ არის მნიშვნელოვანი: დღეს სტუდენტებს, რომლებიც თსუ ბიბლიოთეკის მიმდებარე ტერიტორიაზე აქციის ფლაერებს არიგებდნენ, ფიზიკურად დაუპირისპირდნენ.

  • სტუდენტები ამბობენ, რომ თავდამსხმელები ქართული ოცნების მხარდამჭერები არიან.

თსუ-ს განცხადებით, სიტუაციის განმუხტვა უნივერსიტეტის დაცვის და უსაფრთხოების სამსახურის თანამშრომლებმა შეძლებისდაგვარად მოახერხეს.

  • მიმართავენ ყველა პოლიტიკურ ძალას "თავი შეიკავოს მსგავსი ქმედებებისგან".
  • საუბრობენ, რომ სტუდენტები, პროფესორ-მასწავლებლები თუ ადმინისტრაციის თანამშრომლები შეუზღუდავად სარგებლობენ საქართველოს კონსტიტუციით მინიჭებული უფლებებითა და თავისუფლებებით.
  • "საუკუნეზე მეტია უნივერსიტეტი ემსახურება საზოგადოების განათლებას, ქვეყანაში დემოკრატიული პრინციპების დამყარებასა და განმტკიცებას".

შსს-მ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

თავდასხმები დაგმეს არასამთავრობო ორგანიზაციებმაც. ისინი სამართალდამცავ ორგანოებს ინციდენტების აღსაკვეთად პრევენციული ღონისძიებების გატარებისკენ მოუწოდებენ.

  • IDFI-ის თქმით, აქციის წარმომადგენლებზე თავდასხმა დანაშაულის ნიშნებს შეიცავს და კოორდინირებულ ხასიათს;
  • საია მმართველ პარტიას მოუწოდებს, მისი მხარდამჭერების მობილიზება შეწყვიტოს.

სახალხო დამცველის თქმით, #შინევროპისკენ წარმომადგენლებზე თავდასხმები დამაშინებელ გარემოს ქმნის.

არქივიდან: 24 ივნისს აქციაზე #შინევროპისკენ პრემიერმინისტრის, ირაკლი ღარიბაშვილის გადადგომა მოითხოვეს.

  • მონაწილეების მიერ მთავრობისთვის დაწესებული ერთკვირიანი ვადა კვირას, 3 ივლისს გადის;
  • პირობების შეუსრულებლობის შემთხვევაში, მოქალაქეები პარლამენტის წინ შეიკრიბებიან და მათ შესრულებამდე არ დაიშლებიან.