ილია იაშინის დაკავების შესახებ ინფორმაციას ჟურნალისტზე, ირინა ბაბლოიანზე დაყრდნობით Reuters ავრცელებს.

რატომ არის მნიშვნელოვანი: განსხვავებული აზრის მქონე სამოქალაქო აქტივისტების, პოლიტიკოსების, მედიის წარმომადგენლების დაკავება კრემლის უცვლელი პოლიტიკაა.

  • ასე ცდილობს ვლადიმერ პუტინი კრიტიკული აზრის ჩახშობას, განსაკუთრებით, უკრაინაში ომის დაწყების შემდეგ.

დეტალები: ბაბლოიანის თქმით, იაშინი მაშინ დააკავეს, როცა ქუჩაში ერთად გადადგილდებოდნენ.

  • "ჩემს მეგობართან, ილია იაშინთან ერთად პარკში მივდიოდი. პოლიცია მოვიდა და ილია წაიყვანა".

რას ამბობს ადვოკატი: მედიის ცნობით, ვადიმ პროხოროვი, რომელიც აქამდე სხვა არაერთ ოპოზიციონერს წარმოადგენდა, ინფორმაციას ადასტურებს.

  • მისი თქმით, იაშინი განყოფილებაში, სავარაუდოდ, პოლიციისადმი დაუმორჩილებლობის ბრალდებით გადაიყვანეს.

ვინ არის ილია იაშინი: Meduza-ს ცნობით, იაშინი ერთ-ერთი იმ ოპოზიციონერთაგანია, რომელმაც ომის დაწყების შემდეგ ქვეყანაში დარჩენა გადაწყვიტა.

  • მის წინააღმდეგ 4 ადმინისტრაციულ სამართალდარღვევათა ოქმია შედგენილი.
  • იაშინი მოქალაქეებს ომის შესახებ სიმართლეს თავისი Youtube არხისა და სოციალური მედიების საშუალებით აწვდის.