ბელარუსის პრეზიდენტის სპეციალური წარმომადგენელი, ვიქტორ შეიმანი აფხაზეთის დე ფაქტო რესპუბლიკაში ჩავიდა.

რატომ არის მნიშვნელოვანი: ბელარუსს აფხაზეთის დამოუკიდებლობა აღიარებული არ აქვს, თუმცა 2009 წელს მინსკი ოკუპირებული აფხაზეთის და ცხინვალის რეგიონის აღიარების საკითხს განიხილავდა.

დეტალები: როგორც აფხაზეთის დე ფაქტო პრეზიდენტის ადმინისტრაციის ვებგვერდზე წერია, მათ "ორმხრივი ინტერესის, ევრაზიული ინტეგრაციის აქტუალური საკითხები, საინვესტიციო და ეკონომიკური თანამშრომლობის პერსპექტივები" განიხილეს.

  • შეხვედრას ესწრებოდნენ აფხაზეთის დე ფაქტო პრეზიდენტი ასლან ბჟანია და საგარეო საქმეთა მინისტრი ინალ არძინბა.

კონტექსტი: ინალ არძინბა, რომელიც ამ შეხვედრას ესწრებოდა, წლების განმავლობაში კრემლში მუშაობდა.

  • ის დსთ-სთან, აფხაზეთთან და ცხინვალის რეგიონთან ურთიერთობებში პუტინის თანაშემწის, ვლადისლავ სურკოვის თანაშემწე იყო.
  • როგორც სფეროს სპეციალისტები ვარაუდობდნენ, არძინბამ მალევე დაიწყო კრემლის პოლიტიკის გატარება.