ინფორმაციას საერთაშორისო გამჭვირვალობა — საქართველო ავრცელებს. სწორედ მათ წარადგინეს სარჩელი.

რატომ არის მნიშვნელოვანი: საქმე ეხება 5 ივლისს ძალადობრივი ჯგუფების მიერ მოძრაობა სირცხვილიას ოფისზე თავდასხმასა და აქტივისტების წინააღმდეგ მიმართულ ფართომასშტაბიან და ორგანიზებულ ძალადობას.

  • ძალადობის ორგანიზატორები ამ დრომდე არ დასჯილან.

დეტალები: TI სასამართლოში აქტივისტების — სალომე ნიკოლეიშვილის (ბარკერი), ზურაბ ბერძენიშვილის, გიორგი მაქარაშვილისა და მარიამ დოლიძის ინტერესებს ინტერესებს იცავს.

  • ორგანიზაციის ცნობით, საჩივარში აქცენტი სახელმწიფოს უმოქმედობაზე, ორგანიზატორების დაუსჯელობაზე, დანაშაულის არაეფექტიან გამოძიებასა და პროკურატურის მიერ მსხვერპლთა დაზარალებულად არ ცნობაზეა გაკეთებული.
  • ისინი სტრასბურგის სასამართლოსგან ითხოვენ დაადგინოს ადამიანის უფლებათა ევროპული კონვენციის 6 მუხლის, კერძოდ მე-3, მე-8, მე-10, მე-11, მე-13 და მე-14 მუხლების დარღვევა.

არქივიდან: 5 ივლისს, როცა ადამიანები საკუთარი ფუნდამენტური უფლებების დასაცავად რუსთაველის გამზირზე უნდა გამოსულიყვნენ, ჰომოფობიურმა ჯგუფებმა ტერიტორია დაიკავეს და ჟურნალისტებს ფიზიკურად გაუსწორდნენ.

  • თავდასხმის შედეგად დაშავდა 50-ზე მეტი ჟურნალისტი.
  • 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.
  • ძალადობის ორგანიზატორების პასუხისმგებლობის საკითხი დღემდე არ დამდგარა - ძალადობრივმა ჯგუფებმა კი ერთი წლის შემდეგ ისევ დაიწყეს მუქარა პრაიდის კვირეულის ფარგლებში გასამართ ღონისძიებებზე.