ინგლისელი მსახიობი და კომიკოსი, როუენ ატკინსონი, ცნობილი ადამიანებისადმი ბოიკოტის გამოცხადების კულტურას, ეგრეთ წოდებულ Cancel Culture-ს უპირისპირდება და ამბობს, რომ კომედიის დანიშნულება სწორედაც რომ სხვების გაღიზიანებაა.

მსახიობი, რომელსაც მსოფლიოში მისტერ ბინადაც იცნობენ — მისი ცნობილი პერსონაჟის გამო — აცხადებს, რომ "ყოველ ხუმრობას თავისი მსხვერპლი ჰყავს".

"ჩემთვის ასეა: კომედიის საქმე სხვების გაღიზიანებაა, ან სხვების გაღიზიანების პოტენციალის ქონა მაინც. ამიტომ, მას ამ პოტენციალს ვერ გამოვაცლით", — აღნიშნავს ატკინსონი, — "ყოველ ხუმრობას თავისი მსხვერპლი ჰყავს. ხუმრობის განსაზღვრება ასეთია: ვიღაც, რაღაც ან აზრი სასაცილო უნდა გამოჩნდეს".

კომიკოსის თქმით, აუცილებელი არაა, ხუმრობების სამიზნე ყოველთვის ძალაუფლების მქონე პირები იყვნენ. ატკინსონი ამბობს, რომ საზოგადოებაში ბევრი "ამპარტავანი, აგრესიული და თვითკმაყოფილი" ადამიანია, რომელიც ასევე იმსახურებს, "მსხვერპლად" იქცეს.

ატკინსონი ასევე აღნიშნავს, რომ თავისუფალ საზოგადოებაში ხუმრობა "აბსოლუტურად ყველაფერზე" უნდა შეიძლებოდეს. თუმცა, დასძენს, რომ ყველა ხუმრობა ყველასთვის არაა განკუთვნილი.

ნეტფლიქსზე კი მალე ახალი კომედიური სერიალი, Man vs. Bee დაიწყება, სადაც ატკინსონი მთავარ როლს ასრულებს.