კითხვა პრემიერმინისტრს კატარის ეკონომიკურ ფორუმზე წამყვანმა დაუსვა, თუმცა პირდაპირი პასუხი არ მიუღია. რის გამოც, ირაკლი ღარიბაშვილს "დიპლომატია" შეუქო.

რატომ არის მნიშვნელოვანი: ოკუპაციის პირობებში, მმართველი გუნდი რუსეთს იშვიათად აკრიტიკებს, პუტინს კი თითქმის არ ახსენებს. ხშირად ჩნდება კითხვები ხელისუფლების პრორუსულობასთან დაკავშირებით.

  • არასამთავრობო ორგანიზაციები და საერთაშორისო პარტნიორები, საუბრობენ რუსეთის მიმართ ხელისუფლების ლოიალურ დამოკიდებულებაზე.
  • მმართველმა გუნდმა არც უკრაინის მხარდამჭერ რეზოლუციაში ახსენა რუსეთი.

დეტალები: ღარიბაშვილი საუბრობდა NATO-ში საქართველოს გაწევრიანების პერსპექტივაზე. მისი თქმით, კონსენსუსი უნდა შედგეს ალიანსის ყველა წევრ სახელმწიფოს შორის.

  • "ჩვენ არ ვართ მიამიტები, ჩვენ გვესმის, რომ საქართველოს აქვს ტერიტორიული პრობლემები" .

წამყვანის თქმით, რუსეთთან საკითხის მოგვარება, ნიშნავს რუსეთის ლიდერთან, პუტინთან ურთიერთობას.

  • "რას ფიქრობთ პუტინზე? ენდობით? თუნდაც შორეულად, მას შემდეგ რაც გაუკეთა უკრაინას?" — ჰკითხა მან.

პასუხად, ღარიბაშვილმა ისაუბრა, რომ ბოლო 30 წლის განმავლობაში სამჯერ ჰქონდა საქართველოს "აგრესიასთან შეხება".

  • მისი თქმით, მთავრობის პოლიტიკა ტერიტორიული მთლიანობისა და სუვერენიტეტის აღდგენასთან დაკავშირებით მშვიდობიანი მოლაპარაკებებია.

წამყვანი დაინტერესდა, დაჰპირდა თუ არა რამეს პუტინი საქართველოს.

  • "აი, რომ დაგპირდეთ, ენდობით?"

პასუხის ნაცვლად კი, მან ისაუბრა, რომ არანაირი პოლიტიკური კონსულტაცია და მოლაპარაკება არ ჰქონიათ რუსეთთან.

  • "მხოლოდ ეკონომიკური სავაჭრო ურთიერთობები არსებობს".