"მინდა, გამოვთქვა ოპტიმისტური მოლოდინი, რომ ტრამპი გაიმარჯვებს "დიფ სთეითზე", თუ დამარცხდება ტრამპი, "დიფ სთეითთან", ეს იქნება ძალიან ცუდი, მაგრამ ჩვენ, ამ შემთხვევაშიც, გავაგრძელებთ ბრძოლას", — ამის შესახებ ოცნების ხელისუფლების პრემიერმინისტრმა ირაკლი კობახიძემ ჟურნალისტებს განუცხადა.

მისი თქმით, არსებობს იმედი და რესურსი იმისა, რომ ტრამპი გაიმარჯვებს "დიფ სთეითზე".

"მთავარია, რომ ჩვენ წარმატებები ვუსურვოთ პრეზიდენტ ტრამპს ამ ბრძოლაში. ეს იქნება კონკრეტული ლოკალური მარცხი "დიფ სთეითთან" მიმართებით, მაგრამ მე მაქვს დიდი იმედი, რომ სხვანაირად წარიმართება ეს პროცესი", — განაცხადა კობახიძემ.

დღეს, 7 მაისს, ქართული ოცნების ყრილობაზე პარტიის ახალი თავმჯდომარედ ირაკლი კობახიძე აირჩიეს.

ქართული ოცნების ყრილობა 18 წუთს გაგრძელდა და სიტყვით გამოვიდნენ: პარტიის ახალი თავმჯდომარე ირაკლი კობახიძე, პარტიის აღმასრულებელი მდივანი მამუკა მდინარაძე და აირჩიეს პოლიტსაბჭოს განახლებული შემადგენლობა.

შეგახსენებთ, რომ პარტია ქართული ოცნების თავმჯდომარის თანამდებობა ვაკანტური მას შემდეგ გახდა, რაც ირაკლი ღარიბაშვილმა პარტიიდან და პოლიტიკიდან წასვლის შესახებ განცხადება გააკეთა.

აღსანიშნავია, რომ კობახიძე ამ თანამდებობაზე მეორედ იქნა არჩეული. ის პარტია ქართული ოცნების თავმჯდომარე 2021 წლის 16 იანვრიდან 2024 წლის 24 იანვრამდეც იყო.