Foreign Press USA-ს კორესპონდენტი ალექს რაუფოღლუ სოციალურ ქსელში წერს რომ "MEGOBARI აქტი" სენატმა განსახილველად მიიღო და კალენდარში ჩასვა.

"MEGOBARI აქტი" სენატში მიიღეს. ორჯერ წაიკითხეს. სენატის საკანონმდებლო კალენდარში ზოგადი ბრძანებების ქვეშ მოხვდა. კალენდარი #70

ეს კანონპროექტი ეწინააღმდეგება ივანიშვილის რეჟიმს, რომელიც საქართველოს ირანელი ტერორისტების, ჩინეთის კომუნისტური პარტიის და ომის დამნაშავე პუტინისკენ უბიძგებს, ამბობს კანონპროექტის ავტორი ჯო უილსონი.

უილსონი: "MEGOBARI აქტის" მიღება, მანდატის თითქმის 90-პროცენტიანი ხმებით, აჩვენებს ამერიკის მხარდაჭერას ლეგიტიმური პრეზიდენტის, სალომე ზურაბიშვილის და ქართველი ხალხის მიმართ და უარყოფს მაფიოზების ტირანიას, რომლებიც საქართველოს დიქტატორებს ყიდიან. ქართული ოცნება შეურაცხყოფს პრეზიდენტ ტრამპს. წინსვლის ერთადერთი გზა სამართლიანი არჩევნები და ყველა პოლიტიკური პატიმრის გათავისუფლებაა", — წერს ალექს რაუფოღლუ.

შეგახსენებთ, რომ 6 მაისს, წარმომადგენელთა პალატაში "MEGOBARI აქტს" მხარი 349 კონგრესმენმა დაუჭირა, რაც კანონპროექტის 80%-იანი მხარდაჭერაა. მის წინააღმდეგ ხმა 42-მა კონგრესმენმა მისცა.

წარმომადგენელთა პალატაში კენჭისყრას წინ უსწრებდა დებატები "MEGOBARI აქტის" შესახებ. სიტყვით გამოვიდა ხუთი კანონმდებელი, სამი რესპუბლიკელი და ორი დემოკრატი: რესპუბლიკელები — ბრაიან მასტი (პალატის საგარეო ურთიერთობათა კომიტეტის თავმჯდომარე), ჯო უილსონი და უორენ დევიდსონი და დემოკრატები ჯონი ოშესკი და სტივ კოენი. აქედან ოთხმა მხარი დაუჭირა "MEGOBARI აქტის" მიღებას, ერთი, რესპუბლიკელი უორენ დევიდსონი წინააღმდეგი იყო.

წარმომადგენელთა პალატის შემდეგ, სანამ კანონპროექტი ხელმოსაწერად პრეზიდენტ დონალდ ტრამპამდე მიაღწევს, ის სენატმაც უნდა დაამტკიცოს.

მეტი "MEGOBARI აქტის" შესახებ: