ქართული ოცნების პრემიერმინისტრ და უკვე პარტიის თავმჯდომარე, ირაკლი კობახიძის შეფასებით, "MEGOBARI აქტი" ჯორჯ ორუელისეულ მიდგომას ავლენს და ხელისუფლების მიმართ მტრული დამოკიდებულებით არის გამსჭვალული.

"ძალიან მოკლედ გიპასუხებთ MEGOBARI აქტთან დაკავშირებით, რომელიც სინამდვილეში არის აბსოლუტურად მტრული აქტი და აქ ვლინდება ორუელისეული მიდგომა, რომ მეგობარი არის მტერი, ომი არის მშვიდობა და ა.შ. ამის გაგრძელებაა. როგორ შეიძლება, მეგობარი აქტი ერქვას აქტს, რომელიც თავიდან ბოლომდე ქართველი ხალხის მიმართ და ქართველი ხალხის მიერ არჩეული ხელისუფლების მიმართ მტრული დამოკიდებულებით არის გამსჭვალული.
ეს არის, რა თქმა უნდა, მტრული აქტი," — განაცხადა კობახიძემ.

კობახიძის აზრით, Deep State-სა და დონალდ ტრამპს შორის ბრძოლა გრძელდება, ხოლო "MEGOBARI აქტის" მხარდაჭერით Deep State-მა გაიმარჯვა.

"გრძელდება ბრძოლა ტრამპსა და Deep State-ს შორის. როდესაც ხდება ასეთი გადაწყვეტილების მიღება, ეს ნიშნავს, რომ კონკრეტულ მომენტში Deep State-მა ასე ვთქვათ სძლია ტრამპის ადმინისტრაციას. ეს ვიხილეთ ჩვენ ამ ორიოდე დღის წინ.
გვაქვს ჯერ კიდევ ოპტიმისტური მოლოდინი, რომ ტრამპის ადმინისტრაცია დაამარცხებს Deep State-ს. თუ ასე მოხდება, დალაგდება ურთიერთობები საქართველოსა და აშშ-სთან. არიან ადამიანები, რომლებიც არიან არა პრეზიდენტ ტრამპის, არამედ Deep State-ის გავლენის ქვეშ. ჯო უილსონი მაგალითად, ჯო უილსონი არის თავიდან ბოლომდე Deep State. ამ შემთხვევაში გაიმარჯვა Deep State-მა. მაგრამ მე მაქვს ოპტიმისტური მოლოდინი, რომ პრეზიდენტი ტრამპი აჯობებს Deep State-ს," — განაცხადა ირაკლი კობახიძემ.

დღეს, 7 მაისს, ქართული ოცნების ყრილობაზე პარტიის ახალი თავმჯდომარედ ირაკლი კობახიძე აირჩიეს.

ქართული ოცნების ყრილობა 18 წუთს გაგრძელდა და სიტყვით გამოვიდნენ: პარტიის ახალი თავმჯდომარე ირაკლი კობახიძე, პარტიის აღმასრულებელი მდივანი მამუკა მდინარაძე და აირჩიეს პოლიტსაბჭოს განახლებული შემადგენლობა.

შეგახსენებთ, რომ პარტია ქართული ოცნების თავმჯდომარის თანამდებობა ვაკანტური მას შემდეგ გახდა, რაც ირაკლი ღარიბაშვილმა პარტიიდან და პოლიტიკიდან წასვლის შესახებ განცხადება გააკეთა.

აღსანიშნავია, რომ კობახიძე ამ თანამდებობაზე მეორედ იქნა არჩეული. ის პარტია ქართული ოცნების თავმჯდომარე 2021 წლის 16 იანვრიდან 2024 წლის 24 იანვრამდეც იყო.