ჯონათან დემის 1993 წლის ფილმში Philadelphia (ფილადელფია) შესრულებულმა როლმა ტომ ჰენკსს პირველი ოსკარი მოუტანა: მან ახალგაზრდა გეი კაცი განასახიერა, რომელიც აივ ინფექციით დაინფიცირების შემდეგ სამსახურიდან გაუშვეს.

ახლა, თითქმის 30 წლის შემდეგ, ტომ ჰენკსი ამბობს, რომ მას ან ნებისმიერ სხვა ჰეტეროსექსუალ მსახიობ კაცს ღიად გეი პერსონაჟის შესრულების შესაძლებლობა აღარ მიეცემა და ჰოლივუდის ღირებულებების ამ მხრივ ცვლილებას იზიარებს კიდეც.

"მოდი ვთქვათ, 'შეძლებდა ჰეტეროსექსუალი კაცი ახლა იმავეს გაკეთებას, რაც მე ფილადელფიაში გავაკეთე'? არა და ძალიანაც კარგი, რომ ასეა. ფილადელფიის მთელი სათქმელი ის იყო, რომ არ უნდა გეშინოდეს [აივ ინფექციის / გეი ადამიანების]. ერთ-ერთი მიზეზი კი, რის გამოც ხალხს ამ ფილმის არ ეშინოდა, ისაა, რომ იცოდნენ, გეის როლს მე ვთამაშობდი. ჩვენ ეს უკვე უკან მოვიტოვეთ, აღარ მგონია, რომ დღეს მაყურებელმა მარტივად მიიღოს ჰეტეროსექსუალის მიერ გეის როლის თამაშის მსგავსი არაავთენტიკურობა", — განაცხადა ჰენკსმა The New York Times-თან ინტერვიუში.

ტომ ჰენკსი ფილმში ფილადელფია.

ფოტო: Everett Collection

"დანაშაული არ არის, თუ ვინმე იტყვის, რომ ფილმისგან თანამედროვეობის შესაფერისი სინამდვილის ასახვას უფრო ელოდება. ისე ხომ არ ჩანს, რომ ვინმეს ჭკუას ვარიგებ? ყოველ შემთხვევაში, ჩემი განზრახვა ეს არ ყოფილა", — დააზუსტა მსახიობმა.

ფილადელფიაში შესრულებულმა როლმა ტომ ჰენკსს როგორც ოსკარი, ისე ოქროს გლობუსი და საყოველთაო აღიარება მიუტანა.

აღსანიშნავია, რომ ეს პირველი შემთხვევა არაა, როცა ჰოლივუდში ჰეტეროსექსუალი მსახიობების მიერ ქვიარ პერსონაჟების განსახიერების პრობლემურობას განიხილავენ: ადრე ედი რედმეინმა განაცხადა, რომ ფილმში დანიელი გოგო ტრანსგენდერი გმირის როლის შესრულებას ნანობს.